Եթե «Պատիվ ունեմ» դաշինքը որոշի վերցնել մանդատները, գնալու եմ խորհրդարան. Արթուր Վանեցյան (տեսանյութ)

Ընտրությունների արդյունքները սպասելի չէին, բայց ունենք այն, ինչ ունենք։ Այս մասին այսօր կայացած մամուլի ասուլիսին հայտարարեց «Պատիվ ունեմ» դաշինքի ղեկավար, «Հայրենիք» կուսակցության նախագահ Արթուր Վանեցյանը։

«Հուսահատվելու կարիք չկա, մեր պայքարը շարունակվում է, մենք չենք շեղվում մեր ճանապարհից, անշեղորեն հավատարիմ ենք մնալու մեր հայտարարած բոլոր սկզբունքներին, և, ինչպես հանդես ենք եկել ընդդիմադիր դաշտում, շարունակելու ենք նույն կերպ հանդես գալ ընդդիմադիր դաշտում»,–ասաց նաև հայտնեց, որ վերջին 2-3 օրերի ընթացքում մենք բազմիցս հայտարարել ենք, որ «Պատիվ ունեմ» դաշինքի ակտիվիստների, նախընտրական շտաբների աշխատակիցների նկատմամբ սկսել է տեռոր։

Ինչ վերաբերում է մանդատները վերցնելու հարցին, Արթուր Վանեցյանն ասաց․«Եթե որոշում կկայացնի դաշինքը, որ գնում է խորհրդարան, վերցնելու է մանդատները, միանշանակ ես իմ թիմին չեմ թողնի մենակ, գնալու եմ խորհդարան և շարունակելու ենք մեր պայքարը խորհրդարան։ Ցավոք սրտի մանդատներ չվերցնելը որևէ իրավական հետևանք չի առաջացնում, այսինքն, եթե մենք չենք վերցնում մանդատները, խորհրդարանը շարունակում է գործել»,–ասաց նա և նշեց երևի թե սխալներ ունեն, որ նման արդյունք ունեն։

Արթուր Վանեցյանն ասաց, որ այս ընտրությունների արդյունքով չլուծվեց մեր երկրի հարցերը, արցախյան հակամարտության հարցը, ՀՀ տարածքում մեկ ամսից ավելի գտնվող ադրբեջանական զինվորների հարցը։ Նա վստահեցրեց, որ ընտրակաշառք բաժանելու գործընթաց չեն ունեցել։

«Ես Նիկոլ Փաշինյանի ելույթում չտեսա հստակ համերաշխության կոչ և ցանկություն, ես տեսա նույն սպառնալիքների տարափ՝ ուղղակի ձևակերպված ավելի մեղմ և գեղեցիկ բառերով։ Խոսքերին հավատալ ես չեմ ուզում և չեմ կարող։ Մեր վերաբերմունքը Նիկոլ Փաշինյանին լինելու է հայելային»,–ասաց նա և նշեց, որ սպառնալիքների տարափ կա իրենց դաշինքի աջակիցների նկատմամբ։

Նա նշեց, որ կոշտ ընդդիմադիր են լինելու։ «Դա չի նշանակում, որ մենք պետք է լինենք փաստացի իշխանությունների հետ թշնամության մեջ, թշնամիներ երկրի ներսում որևէ մեկը չպետք է տեսնի և չունենա»,–ասաց նա և նշեց, որ իրենք իրենց առաջ դրված խնդիրը չեն կարողացել կատարել։

Արթուր Վանեցյանը հայտնեց, որ «Հայաստան» դաշինքի ղեկավարի հետ ընտրություններից հետո չի խոսել, իսկ Նիկոլ Փաշինյանից որևէ առաջարկ չի ստացել հանդիպման համար։ «Իսկ ստանալու դեպքում չեմ կարծում, որ կարող ենք հանդիպել ու ինչ–որ բանի մասին զրուցել»,–ասաց նա։