Խուզարկվել է «Պատիվ ունեմ» դաշինքից Դավիթ Համբարձումյանի բնակարանը և մեքենան, Արթիկում առևանգվել է պատգամավորի 2 թեկնածու, հոսանքազրկված են եղել մի շարք մարզեր. Մամիջանյան (տեսանյութ)
Պետք է արձանագրենք մի քանի փաստեր, որ դեռևս վաղ է խոսել ընտրությունների արդյունքների ամփոփման մասին, քանի որ ընտրական գործընթացի կարևոր փուլը՝ հաշվարկը դեռևս առջևում է, բայց մենք կարձանագրենք մի քանի աղաղակող փաստեր, որոնց մասին եզրակացությունները թողնում եմ ձեզ: Այս մասին այսօր հրավիրված մամուլի ասուլիսի ընթացքում ասաց «Պատիվ ունեմ» դաշինքի պատգամավորի թեկնածու Հայկ Մամիջանյանը:
«Առաջին հերթին քիչ առաջ խուզարկվել է մեր դաշինքի թեկնածու Մասիսի քաղաքապետ Դավիթ Համբարձումյանի բնակարանը և փորձ է կատարվել խուզարկելու նաև մեքենան։ Սա հերթական անօրինությունն է, որն իրականացվում է գործող ուժի կողմից, իրականացնողն այս պահին ԱԱԾ-ն է»,- ասաց Հայկ Մամիջանյանը:
Նա նաև ընդգծեց, որ Արթիկում առևանգվել են «Պատիվ ունեմ» դաշինքի 2 պատգամավորության թեկնածուների և շտաբի 2 աշխատակիցների:
«Տրամադրվել է տվյալ, որ նշված անձինք տեղափոխվելու են Արթիկ քաղաք, բայց ԱԱԾ-ն չի տալիս պարզաբանում նրանց գտնվելու վայրի մասին ո՛չ Արթիկում, ո՛չ Գյումրիում»,- նշեց նա:
Հայկ Մամիջանյանը նաև նշեց, որ փաստացի հոսանքազրկվել է ՀՀ մարզերի զգալի հատվածը: «Արմավիրը, Արթիկը, Գյումրին, Վանաձորը, Տավուշը, Ապարանը հոսանքազրկվել են, և ստացվում են տեղեկություններ, որ ապօրինի գործունեությունն իրականացնելու համար գործող ուժը մի շարք այլ մարզեր ևս հոսանքազրկելու է»,- ասաց Հայկ Մամիջանյանը:
«Պատիվ ունեմ» դաշինքի պատգամավորության թեկնածուն նաև ընդգծեց, որ վաղ առավոտից սկսած ՊՆ-ի քաղաքական ղեկավարությունը հերթական անգամ խայտառակեց ինքն իրեն, 44-օրյա պատերազմի ընթացքում մեր տղերքին իրենք տանում էին թուրքի բերան:
«Իսկ հիմա փորձում են մեր տղերքի արժանապատվությունը, կամաարտահայտման հնարավորությունը մատաղ անել ներքին թուրքին, և օրվա ընթացքում բազմաթիվ փաստեր արձանագրվեցին, որ ՊՆ-ի քաղաքական ղեկավարությունը փորձում է իրականացնել ուղղորդում»,- նշեց պատգամավորության թեկնածուն: