«Հեղափոխականները»` ընդդեմ «նախկինների». ի՞նչ ակնկալել Հայաստանում անցկացվող խորհրդարանական ընտրություններից. РБК

Հայաստանում արտահերթ խորհրդարանական ընտրությունները գործնականում դուելի կվերածվեն երկու անհաշտ հակառակորդների` հեղափոխական ուժերի և այսպես կոչված` նախկին իշխանությունների ամենավառ ներկայացուցիչների` Փաշինյանի և նախկին նախագահ Քոչարյանի միջև:

Առաջինը մարտին այլընտրանք չունեցող ֆավորիտի տեսք ուներ, սակայն ընտրությունների օրվան ընդառաջ, ըստ հասարակական կարծիքի վերջին հարցումների, երկուսի հնարավորությունները հավասարվել են: Այս մասին գրում է РБК-ն` վերլուծելով ընտրությունների հնարավոր արդյունքներն ու ընթացքը:

Ինչպես նկատում է պարբերականը, Հայաստանի հաջորդ վարչապետը ստիպված կլինի տնտեսությանն ու անվտանգությանն առնչվող բազմաթիվ հարցեր լուծել. 4,5 տարի անց լրանալու է ռուս խաղաղապահների մանդատը Լեռնային Ղարաբաղում, և եռակողմ հայտարարությամբ նրանք ստիպված կլինեն հեռանալ տարածաշրջանից, եթե կողմերից մեկը չհամաձայնի երկարաձգել առաքելությունը:

«Մարտին, երբ Փաշինյանը հայտարարեց արտահերթ ընտրություններ անցկացնելու մասին, վերջինս այլընտրանք չունեցող ֆավորիտ էր համարվում, որի հաղթանակն անխուսափելի էր թվում: Այն ժամանակ վարչապետական «Քաղաքացիական պայմանագիր» կուսակցության օգտին, չնայած պատերազմում կրած պարտությանը, պատրաստ էր քվեարկել հարցվածների մոտ 32 տոկոսը, իսկ Ռոբերտ Քոչարյանի «Հայաստան» դաշինքի օգտին` մոտ 6 տոկոսը: Ներկայում իրավիճակն արմատապես փոխվել է. Փաշինյանի և Քոչարյանի կուսակցությունների վարկանիշերը հավասարվել են: Հունիսի 5-7-ը MPG սոցիոլոգիական ծառայության (Gallup International-ի գործընկերը Հայաստանում) անցկացրած վերջին հարցման համաձայն`Փաշինյանի դաշինքի օգտին քվեարկելու է հարցվածների 23,8 տոկոսը, երկրորդ նախագահի դաշնակիցների օգտին` 24,1 տոկոսը»,- գրում է աղբյուրը:

Վերլուծության հեղինակը նշում է, որ Փաշինյանի նախընտրական վարկանիշի փոփոխության վրա ազդեցություն ունեցած գործոններից մեկը հայ-ադրբեջանական սահմանին տիրող իրավիճակի լարվածության սրումն է, երբ ադրբեջանական ուժերը մայիսին մտան Սյունիքի և Գեղարքունիքի մարզերի տարածք:

Ըստ աղբյուրի` Ռոբերտ Քոչարյանն ընտրություններին նախորդող վերջին շաբաթվա ընթացքում, ընդհակառակը, հզորացել և նոր նշանակալի դաշնակիցների է ձեռք բերել: Հունիսի 18-ին նրան աջակցություն է հայտնել ԳՇ նախկին ղեկավար Օնիկ Գասպարյանը` բոլոր զնվորականներին կոչ անելով այդպես վարվել, իսկ հունիսի 14-ին Քոչրայանին իր աջակցությունն է հայտնել նախկին վարչապետ Կարեն Կարապետյանը:

«Քոչարյանը վայելում է Մոսկվայի բարեհաճությունը. ապրիլին սկսելով իր քարոզարշավը` նա անմիջապես հիշեցրել է ՌԴ նախագահ Վլադիմիր Պուտինի հետ շփումներ ունենալու մասին: Նրանց ջերմ բարեկամական հարաբերությունների մասին բազմիցս խոսել է Կրեմլի ներկայացուցիչ Դմիտրի Պեսկովը»,- նշում է հեղինակը:

Կարևոր չէ, թե ինչ տեղի կունենա հունիսի 20-ին, այլ այն, թե ինչ կլինի հաջորդ օրն ու հունիսի 22-ին: Նման կարծիք է հայտնել քաղաքագետ Ալեքսանդր Իսկանդարյանը: Նրա կանխատեսմամբ` հունիսի 21-ի առավոտյան երկու ուժն էլ կհայտարարի իր հաղթանակի մասին` հաշվի առնելով, որ քվեարկությունից առաջ նրանք քիչ թե շատ հավասար էին առաջ գնում, և կփորձեն մարդկանց փողոց դուրս բերել:

Քաղաքագետ Ստեփան Դանիելյանը, իր հերթին, կարծիք է հայտնել, որ եթե հաղթի Քոչարյանը, ապա Փաշինյանի կողմնակիցները չափազանց բարոյալքված կլինեն զանգվածային փողոցային ակցիաներ իրականացնելու համար: Նրա կարծիքով` եթե ցնցումներ էլ լինեն, ապա Փաշինյանի վերընտրվելու դեպքում: