«Քեզ խելոք պահիր, մեկ է՝ մենք կրելու ենք ու դու քո հալը կտեսնես»․ Աշոտյանն ահազանգում է ուժային կառույցների կողմից «Պատիվ ունեմ» դաշինքի շտաբի պետերի նկատմամբ երեկվանից սկսած հետապնդումների մասին
«Պատիվ ունեմ» դաշինքի կենտրոնական շտաբներում ահազանգեր են ստացվել առ այն, որ իշխանությունն իրավապահ համակարգի միջոցով վերջին ճիգերն է գործադրում ազդելու ընտրությունների արդյունքների վրա։ Մասնավորապես գործի է դրվել իշխանական ուժային եռյակը՝ Ոստիկանություն, Դատախազություն, ԱԱԾ։ Այս մասին ասուլիսի ժամանակ ասաց «Պատիվ ունեմ» դաշինքի ներկայացուցիչ, ՀՀԿ փոխնախագահ Արմեն Աշոտյանը։
«Վաղ առավոտից Երևանի մի շարք վարչական շրջաններում ԱԱԾ աշխատակիցները բերման են ենթարկում և խուզարկություն են իրականացնում «Պատիվ ունեմ» դաշինքի շտաբի պետերի նկատմամբ։ Մասնավորապես, Զեյթուն վարչական շրջանի մեր նախընտրական շտաբների պետերն առանց որևէ հիմքի ենթարկվում են ԱԱԾ ճնշումներին»,– ասաց նա։
Արմեն Աշոտյանի կարծիքով՝ այս գործողությունների նպատակն է ճնշում գործադրել իրենց թիմի վրա և խաթարել շտաբների աշխատանքն ընտրություններին ընդառաջ։
«Եռյակից երկրորդը Ոստիկանությունն է։ Ոստիկանական տարբեր բաժանմունքներ հանրապետությունով մեկ հրավիրում են տարբեր ազդեցիկ մարդկանց և նրանց հետ տանում են, այսպես կոչված, պրոֆիլակտիկ զրույցներ։ Այդ զրույցի էությունը հետևյալն է․ «քեզ խելոք պահիր, մեկ է՝ մենք կրելու ենք ու դու քո հալը կտեսնես»»։
Աշոտյանը նշեց, որ երրորդ ահազանգը Գլխավոր դատախազությունից է։ «Գլխավոր դատախազությունն իր բոլոր ստորաբաժանումներին իջեցրել է հրահանգ և երեկ գիշերվանից Դատախազություն են հրավիրվում տարբեր համայնքների ղեկավարներ և նրանց նկատմամբ տարվում է նույն սպառնալիքներով լի զրույցը, որ «եթե քեզ խելոք չպահես, եթե ընդդիմության համար աշխատես, մասնավորապես «Պատիվ ունեմ» դաշինքի, ապա մեզ համար 5 րոպեի հարց է քեզ համար քրեական գործ սարքելը»»։
Արմեն Աշոտյանը շեշտեց, որ այս պատժիչ գործողությունները փաստագրված են։ Միաժամանակ խոսելով «Քաղաքացիական պայմանագիր» կուսակցության երեկվա հանրահավաքի մասին, ՀՀԿ փոխնախագահը նշեց․
«Երեկվա օրը կապիտուլյանտի հերթական մեխն էր սեփական քաղաքական դագաղի մեջ։ Երեկ ամբողջ լրահոսը ծփում էր ահազանգերից, թե ինչպես է օգտագործվում վարչական ռեսուրսը մարդ «քերելու» և հանրահավաքին լցնելու համար։ Տասնյակ ահազանգեր եմ ստացել և հրապարակել կոնկրետ ժամեր և քաղաքները, թե որտեղից են շարժվել ավտոբուսները։ Ըստ մամուլի հրապարակումների, երեկ բերման են ենթարկվել նաև հոգեկան առողջության հետ խնդիրներ ունեցող մարդիկ, հատկապես Սևանի հոգեբուժարանի հիվանդները»,– ասաց նա։
Արմեն Աշոտյանը տեղի ունեցածը քաղաքական թրաֆիկինգ որակեց՝ նշելով, որ իրեն անձամբ գրել են նաև տասնյակ դպրոցների տնօրեններ՝ նշելով, որ իրենց ստիպողաբար են բերել հանրահավաքին։