«Ժողովրդի թրի տակով անցնելու» թեսթը. «Առավոտ»

«Վարչապետի պաշտոնակատարն ասում է, որ բոլորը պետք է անցնեն «ժողովրդի թրի տակով», իսկ եթե չանցնեն, նրանց վատ ապագա է սպասվում: «Բոլորը» ասելով, Փաշինյանը նկատի ունի բյուրոկրատիան, ՏԻՄ ղեկավարներին, գործարարներին, դասախոսներին, գիտնականներին, հոգևորականներին, դիվանագետներին՝ բոլորին, ովքեր վարչապետի ներկայիս պաշտոնակատարի կողմնակիցները չեն:

Ենթադրենք, այդպես էլ կլինի՝ «ժողովուրդը» կհանի իր թուրը, կստիպի բոլորին, մեղմ ասած, կռանալ: Այնուամենայնիվ, այստեղ ճշտելու հարցեր կան: Ընդունենք, որ Փաշինյանին ձայն կտա 300 հազար մարդ, Քոչարյանին՝ 250 հազար մարդ, մնացած բոլոր քաղաքական ուժերին 2-3 տասնյակ հազար մարդ: Արդյո՞ք դա կնշանակի, որ այն, ինչ մենք հասկանում ենք «հայ ժողովուրդ» ասելով, հենց այդ 300 հազարն են, իսկ այլ ձևով քվեարկածները, չքվեարկածները, ինչպես նաև 7 միլիոն հայությունը ժողովուրդ չե՞ն:

Քվեարկողների մեծամասնությունը, այո, իրավունք ունի ձևավորել իշխանություն, բայց, կարծում եմ, չի կարող սեփականաշնորհել «ժողովուրդ» անունը: Բայց, ենթադրենք, իմ կարծիքը սխալ է, և «ժողովուրդը» հենց այդ 300 հազարն են: Տեխնիկապես ինչպե՞ս է իրականացվելու «թրի տակով անցնելու» քննությունը: Ենթադրում եմ, որ այդ 300 կամ 500 հազարն ամեն օր չեն կարող վճիռներ կայացնել՝ «ա՛յ դու, հարգարժան պրոֆեսոր, մեր թրի տակով անցել ես, իսկ դու, սրբազան հայր, չես անցել»: Հետևաբար, ժողովուրդը պետք է ինչ-որ մեկին կամ ինչ-որ մի խմբի պատվիրակի այդ «թեսթը» անցկացնելու:

Ո՞վ պետք է լինի այդ «հավատաքննիչը»՝ ԱԱԾ՞-ն, ԿԳՄՍՆ՞-ն, խորհրդարանական քննիչ հանձնաժողո՞վը, գուցե վարչապետն անձա՞մբ պետք է ամեն մեկի գործը քննի (ուրիշ էլ ի՞նչ կարևոր գործ ունի): Կամ՝ գուցե «թրի տակով» անցկացնելու պարտականությունը դնենք որևէ իշխանամետ հ/կ-ի վրա. կարծում եմ՝ դրա տակ հնարավոր կլինի լավ դրամաշնորհ ստանալ: Կամ, վերջապես, կա ևս մի հնարավորություն. հատուկ կառույց ստեղծել` օրինակ, «Մուրճի, պողպատի և հեղափոխական զտման» նախարարություն: Բայց մենք բոլորս պետք է պատրաստվենք այդ «թեսթին», որպեսզի հանկարծ չտապալվենք:

Ինձ թվում է ազնիվ կլիներ, որ արդեն հիմա նախօրոք առաջադրվեր հարցաշար, կամ պնդումների շարք, որի հետ պետք է համաձայն լինեն նրանք, ովքեր հավակնում են մտնել «ժողովրդի թրի տակ անցածների», այսինքն՝ լավ, «ժողովրդական» մարդկանց ակումբի մեջ: Օրինակ, «պատերազմում պարտության, տարածքային և մարդկային զոհերի համար մեղավոր են բոլորը, բացի Փաշինյանից». «միակ բանը, որում Փաշինյանը մեղավոր է, այն է, որ Ռոբերտ Քոչարյանը, Սերժ Սարգսյանը և ուրիշները չեն գնդակահարվել», «Հայաստանի 27 տարվա պատմությունը (1991-2018) բացառապես թալանի և ժողովրդի կեղեքման պատմություն էր»: Եվ այլն: Կարծում եմ, ժամանակն է ամեն մարդ կողմնորոշվի՝ նա «ժողովրդի» հետ է, թե ոչ: Ես արդեն կողմնորոշվել եմ»,-գրում է թերթը։

Նյութն ամբողջությամբ կարդացեք թերթի այսօրվա համարում։