Մենք ոչ թե քարտեզները փոխանակել ենք գերիների հետ, այլ քայլին քայլով ենք պատասխանել․ Փաշինյան
Մենք ոչ թե քարտեզները փոխանակել ենք հայ գերիների հետ, այլ քայլին քայլով ենք պատասխանել։ Այս մասին Գավառում հայտարարեց Նիկոլ Փաշինյանը՝ մանրամասնելով, թե ինչպես են հայրենիք վերադարձվել 15 ռազմագերիները։
Անդրադառնալով լուրին, որ դրա դիմաց Ադրբեջանին են փոխանցել Ակնայի ականապատման քարտեզներ, Նիկոլ Փաշինյանն ասաց, որ խոսքն «այն ականների մասին է, որոնք գտնվում են Ադրբեջանի ԶՈՒ թիկունքում՝ հայտնի հանգամանքների բերումով»։
«ԵԱՀԿ ՄԽ համանախագահությունն անընդհատ շեշտել է հումանիտար ականազերծման անհրաժեշտության մասին: Նոյեմբերի 9-ից հետո մենք պարբերաբեր որոշակի քարտեզներ փոխանցել ենք Ադրբեջանին՝ գերիների, մարմինների փնտրտուքի հարցում որոշակի կառուցողական մթնոլորտ ստեղծելու համար:
Սակայն ժամանակի ընթացքում, մեզ համար անհասկանալի պայմաններում, Ադրբեջանի ղեկավարությունը դադարեցրեց գերիների վերադարձը և դիմեց միջազգային ատյաններին, թե Հայաստանը հրաժարվում է ականների քարտեզներ տրամադրել:
Պաշտոնապես հայտարարում եմ՝ մենք չենք հրաժարվել քարտեզներ տրամադրել»,-ընդգծեց նա։
Նիկոլ Փաշինյանը մանրամասնեց, որ երկու օր առաջ հանդիպել է ԱՄՆ պետքարտուղարի տեղակալ Ֆիլիպ Ռիկերի հետ, որն ասել է, որ ԱՄՆ պետքարտուղար Էնտոնի Բլինկենի հանձնարարությամբ առաքելություն ունի ինչ-որ ճեղքում ապահովել գերիների վերադարձի հարցում:
«Ես, բնականաբար, ասացի, որ պատրաստ ենք համագործակցության ու ահա այսօր գործադրված ջանքերի արդյունքում՝ այդ թվում Վրաստանի վարչապետ Իրակլի Ղարիբաշվիլիի, ԵՄ մեր գործընկերների, մեր 15 գերիները վերադառնում են Հայաստան: Նրանք Կարմիր կամուրջով Ադրբեջանցից անցել են Վրաստան, ապա Բագրատաշենով անցել Հայաստան»,-ասաց նա։