«Հյուսիսային հոսք 2» գազատարը մեծացնում է լայնամասշտաբ պատերազմի ռիսկը. ուկրաինական «Նավթագազ»-ի ղեկավար
Ուկրաինական «Նավթագազ» ընկերության ղեկավար Յուրի Վիտրենկոն մտավախություն ունի, որ ռուսական «Հյուսիսային հոսք 2» գազատարի կառուցման ավարտը կարող է բացասաբար ազդել Արևելյան Եվրոպայի շատ երկրներում, այդ թվում՝ Ուկրաինայում առկա արևմտամետ տրամադրությունների վրա: Այս կարծիքը նա հայտնել է Bloomberg գործակալությանը տված հարցազրույցում:
Ինչպես նշված է նյութում, Վիտրենկոն այս շաբաթ այցելել է Վաշինգտոն: Նա փորձել է համոզել ԱՄՆ օրենսդիրներին նոր միջոցներ ձեռնարկել «Հյուսիսային հոսք 2»-ի դեմ:
Ըստ «Նավթագազ»-ի ղեկավարի վարկածի՝ նախագծի ավարտը «կնշանակի, որ ռուսամետ դիրքորոշումը խթանվում է Արևմուտքի հաշվին»:
«Իրադարձությունների վատագույն զարգացումը միայն այն չէ, որ 2024 թվականից մենք կկորցնենք ՀՆԱ-ի մեծ մասը»,-ասել է Վիտրենկոն:
Նրա վարկածով՝ «ամենավատն այն է, որ դա մեծացնում է լայնամասշտաբ պատերազմի ռիսկը»:
«Իրադարձությունների ամենավատ զարգացումն այն է, որ ուկրաինացիները, և ոչ միայն ուկրաինացիները՝ Արևելյան Եվրոպայի շատ երկրներ, ըստ էության, կտեսնեն, որ Արևմուտքը գործով չի աջակցել իր խոսքերին, սա ուժեղ հարված կլինի այս երկրների արևմտամետ ընտրությանը», -ասել է «Նավթագազ»-ի ղեկավարը:
Ինչպես նշված է նյութում, սենատոր Ջին Շահինը (դեմոկրատ Նյու Հեմփշիրից) և ԱՄՆ Կոնգրեսի վերին պալատի մի խումբ այլ անդամներ երկու կուսակցություններից նշել են, որ մտադիր են շարունակել «Հյուսիսային հոսք 2»-ի դեմ պատժամիջոցների սահմանմանը հասնել:
Նշենք՝ «Հյուսիսային հոսք 2» նախագծով նախատեսված է Ռուսաստանի ափից Բալթիկ ծովի հատակով մինչև Գերմանիա երկու խողովակաշարից բաղկացած գազամուղ կառուցել, որով տարեկան 55 միլիարդ խմ ռուսական գազ կարտահանվի Գերմանիա: Նախագծին դեմ է հանդես գալիս ԱՄՆ-ն, որը ձգտում է եվրոպական շուկայում մեծացնել ամերիկյան թերթաքարային գազի սպառման ծավալները, ինչպես նաև՝ Ուկրաինան, քանի որ գազամուղի գործարկման դեպքում Կիևը դեպի ԵՄ գազի արտահանման հարցում Ռուսաստանի համար կկորցնի իր տարանցիկ նշանակությունը:
Ավելի վաղ Վաշինգտոնը մի քանի անգամ պատժամիջոցային սահմանափակումներ է կիրառել շինարարությանը ներգրավված ընկերությունների նկատմամբ, ինչի պատճառով նրանցից շատերը դուրս են եկել նախագծից, և գործընթացը դադարեցվել է: