Գրեթե ամենօրյա ռեժիմով ունեցել ենք ԱԽ նիստեր, որոնց մասնակցում է արտգործնախարարը, որոշումները, որոնք կայացվել են, կայացվել են այդ նիստերին․ Տիգրան Ավինյան

Այսօր փոխվարչապետ Տիգրան Ավինյանը լրագրողների հետ զրույցում անդրադարձավ հարցին, թե ինչու չի ազատվել հրաժարականի դիմում գրած փոխնախարարներից մեկը։ Նա պատասխանեց, որ Արտաքին գործերի նախարարությունը չի կարող առանց որևէ պաշտոնակատարի մնալ։

«Չէր կարող Արտաքին գործերի նախարարությունում առհասարակ նախարարի պարտականությունները կատարող չլինել, դա էր հիմնական պատճառը»,–ասաց նա և չհամաձայնեց, որ կառույցն անգործունակ է դարձել։

Ինչ վերաբերում է նախկին նախարար Արա Այվազյանի հնչեցրած մեղադրանքներին, ապա նա նշեց, որ այդ մասին իրեն պետք է հարցնել։

«Ինչ վերաբերում պարոն Այվազյանի բարձրաձայնած խնդիրներին, հիմնականում բոլոր մեկնաբանությունները պետք է փորձեք իրենից ստանալ, բայց ես ուզում եմ շատ կարևոր փաստ արձանագրել․ մայիսի 12–ի միջադեպերից այդ օրվանից սկսած գրեթե ամենօրյա ռեժիմով մենք ունեցել ենք Անվտանգության խորհրդի նիստեր, և արտաքին գործերի նախարարը ի պաշտոնե այդ նիստերին մասնակցում է, և այն որոշումները, որոնք կայացվել են, կայացվել են այդ նիստերին՝ արտաքին գործերի նախարարի մասնակցությամբ և, ընդհանուր առմամբ, բոլոր քննարկումները, որոնք մենք ունեցել ենք, Անվտանգության խորհրդի բոլոր անդամները դրա մասին տեղեկացված են եղել, ես դա ուզում եմ վստահաբար ձեզ տեղեկացնել։ Բոլոր որոշումները, որ կայացվել են, եթե եղել է համաձայնություն, անհամաձայնություն, քննարկում եղել է նվազագույնը»,– ասաց նա։