Այսօր՝ հունիսի 8-ին, հանրապետությունում մեկնարկել էին միասնական քննությունները «Աշխարհագրություն», «Կենսաբանություն» և «Ընդհանուր պատմություն» առարկաներից

Այսօր՝ հունիսի 8-ին, հանրապետությունում մեկնարկել էին միասնական քննությունները:

Դիմորդները հանձնել են «Աշխարհագրություն», «Կենսաբանություն» և «Ընդհանուր պատմություն» առարկաներից: ՀՀ-ում գործել է 15 քննական կենտրոն, որոնցից 11-ը՝ մարզերում և 4-ը՝ Երևանում:

Ընդհանուր առմամբ նախատեսվում է, որ քննություն պետք է հանձներ 1505 դիմորդ, որոնցից 186-ը՝ աշխարհագրություն, 1 288-ը՝ կենսաբանություն և 31-ը՝ ընդհանուր պատմություն:

Մարզերի 11 քննական կենտրոններում քննություն հանձնողների նախնական թիվը 1 016 է, որոնցից 157-ն աշխարհագրություն է հանձնելու, 832-ը՝ կենսաբանություն և 27-ը՝ համաշխարհային պատմություն: Մայրաքաղաքում քննական կենտրոնները 4-ն են, դիմորդների ընդհանուր թիվը՝ 489: Նրանցից 29-ն աշխարհագրություն է հանձնելու, 456-ը՝ կենսաբանություն և 4-ը՝ համաշխարհային պատմություն:

ՀՀ կրթության, գիտության, մշակույթի և սպորտի նախարար Վահրամ Դումանյանը լրագրողների հետ զրույցում ասաց, որ մի փոքր դժգոհություն է ունեցել նստարանների տեղաբաշխման վերաբերյալ, որոնք արևի ուղիղ ճառագայթների տակ էին դրված:

«Ես պատկերացրի ինձ, եթե ես քննություն հանձնելիս լինեի, բավականին անհարմար կլիներ մինչև արևը ստվերում հայտնվեր: Նման դիտողություն եմ արել, սակայն հարցն արագ լուծվեց»,- նշեց Դումանյանը:

Անդրադառնալով դիմորդների քիչ լինելուն՝ նա շեշտեց, որ այդ առումով համապատասխան կրթական քաղաքականություն են մշակել և հույս հայտնեց, որ դրանից հետո բնագիտական առարկաներն ավելի գրավիչ կլինեն շրջանավարտների համար: Նախարարը նշեց, որ որոշ առարկաներ էլ մեծ հետաքրքրություն են առաջացնում դիմորդների մոտ, ինչպես օրինակ՝ ինֆորմատիկան և կիրառական մաթեմատիկան:

Նշենք, որ քննության տևողությունը 180 րոպե էր՝ 3 ժամ: Ավարտից քիչ անց՝ ժամը 13:00-14:00, Գնահատման և թեստավորման կենտրոնը հրապարակել է ճիշտ պատասխանները:

Նշենք նաև, որ գնահատականները հրապարակվելու են քննությունը հանձնելու 5-րդ օրը, այս դեպքում՝ հունիսի 13-ին, իսկ բողոքարկել գնահատականը կարելի է դրա հաջորդ օրը՝ մինչև ժամը 18:00-ն: