Պաշտոնապես հաստատված զոհերի թիվը 3700-ին մոտ է, կարող է հասնել մինչև 4000-ի. Նիկոլ Փաշինյան
Զոհվածների պաշտոնապես հաստատված էս պահի թիվը 3700-ին մոտ թիվ է, որը մենք ենթադրում ենք, որ կարող է հասնել մինչեւ 4 հազարի: Այս մասին, այսօր՝ հունիսի 7-ին, Արմավիրի մարզի Գեղակերտ գյուղում քարոզարշավի ժամանակ նշեց վարչապետի պաշտոնակատար, ՔԿ-ի վարչապետի թեկնածու Նիկոլ Փաշինյանը:
«Որեւէ մեկը կարո՞ղ է բացատրել, թե ինչու են շահարկում, ասում՝ 5 հազար, 7 հազար, էդ իրենց ցանկությո՞ւնն է: Զոհի թիվ ավելացնելը ո՞րն է: Նրանք դարձել են Ադրբեջանի իշխանության փաստաբանը: Փաստորեն Ադրբեջանի իշխանությունը կարող է ասել՝ դե իրենք են ասում, իրենք են կոտորել, իրենք են պատերազմ սկսել, պատերազմական հանցագործություններ անել: Այդ մարդիկ դարձել են Ադրբեջանի փաստաբանը, ուզում են ասել, որ Ադրբեջանի իշխանությունը մեր զինվորներին չի կատարել, մենք ենք կոտորել մեր զինվորներին: Մինչդեռ մենք փորձել ենք իրենց թողած խայտառակ բանակցային ժառանգությունից պաշտպանել մեր հայրենիքը: Բայց նրանք պատերազմի ժամանակ զանգում էին գեներալներին, ասում էին՝ ինչի՞ եք կռվում, եկեք Երեւանում կռվեք: Նրանք շարունակում են պատերազմը տեղափոխել ՀՀ տարածք, նրանք ուզում են Հայաստանը վերածել քաղաքացիական պատերազմի թատերաբեմի, բայց մենք դա թույլ չպետք է տանք»,-ասաց Փաշինյանը՝ կոչ անելով քվեարկել հանուն կայունության:
Հիշեցնենք, որ ավելի վաղ՝ ապրիլի 14-ին, ԱԺ-ում Նիկոլ Փաշինյանն անդրադարնալով զոհերի թվերին, ասել էր, որ այդ պահի դրությամբ մահվան վկայականներով հաստատված 3621 զոհ կա, 321 հոգի համարվում է անհետ կորած։
«Միևնույն ժամանակ մենք ունենք ԴՆԹ հետազոտման մեջ գտնվող 201 մարմին կամ մասունք, և ավելի քան 100 նույնականացված մարմին, որ նույնականացվել են կոնկրետ հարազատների հետ, բայց վերջիններս տարբեր պատճառներով հրաժարվում են ընդունել այդ փաստը։ Մեր շատ հայրենակիցներ հավատում են, որ իրենց հարազատները ողջ են, գերեվարված են: Եթե այս վիճակագրությունը չփոխվի, ապա «մեր զոհերի թիվը կլինի 4000-ի կարգի, պլյուս-մինուս 50»,-ասել էր նա: