Այս պահից սկսած՝ ընդհանրապես սխալվելու իրավունք չունենք, դրանով ո՞նց ենք նայելու ձեր աչքերի մեջ, հանդիպումները պետք են, որ ձեզնից ստանանք թավշե մանդատը պողպատեով փոխարինելու լիազորություն․ Փաշինյան

Այս հանդիպումները մեզ պետք են, որ ձեզնից ստանանք ուժ, էներգիա, ձեզնից ստանանք թավշե մանդատը պողպատե մանդատով փոխարինելու լիազորությունը և պողպատե մանդատով կոփենք մեր երկրի ողնաշարը։ Այս մասին Աբովյան քաղաքում համակիրների հետ հանդիպմանը հայտարարեց Նիկոլ Փաշինյանը։

«Հիմա մեր պատասխանատվությունը ավելի մեծ է, քան 2018-ին, որովհետևին 2018-ին, այնուամենայնիվ, ուրիշ իրավիճակ էր, ըստ էության, ամբողջ Հայաստանը մեր դիրքորոշումը պաշտպանում էր, բայց այսօր մեր կողքին կանգնած ամեն մարդու դիրքորոշում մեզ համար տասնապատիկ ավելի մեծ պարտավորություն է։ Սարսափելի պարտավորություն է այն առումով, որ մենք այս պահից սկսած չունենք ոչ մի իրավունք որևէ հարցում ընդհանրապես սխալվելու, որովհետև դրանով մենք ոնց ենք ձեր աչքերի մեջ նայելու»,-ասաց նա։

Փաշինյանը, դիմելով համակիրներին, ասաց․ «Ես ձեզնից յուրաքանչյուրին սիրում, հարգում և գնահատում եմ, ինչպես իմ ընտանիքի յուրաքանչյուր անդամի։ Ձեզնից յուրաքանչյուրի առաջ այնպիսի պարտավորություն ունեմ, ինչպես իմ ընտանիքի որևէ անդամի առաջ։ ՀՀ բոլոր երեխաների առաջ նույնպիսի պարտավորություն ունեմ, ինչպես իմ Արփիի առաջ, բայց ես հասկանում եմ, որ այդ պարտավորությունները կատարելը հեշտ չէ միայն սիրով, ցանկությամբ․ մեզնից պահանջվում են գերմարդկային ջանքեր և ընդունակություններ։ Մենք այսօր եկել ենք ասելու, որ մենք այդ ջանքերը գործադրելու ենք։ Մեզ գերմարդկային ուժ տալիս եք դուք»։