Apple-ը նախատեսում է անլար լիցքավորմամբ iPad Mini և iPad Pro թողարկել. Bloomberg

Ամերիկյան Apple կորպորացիան 2021 թվականին նախատեսում է թողարկել նոր iPad Mini և 2022 թվականին՝ նոր iPad Pro: Այս մասին հայտնում է Bloomberg-ը՝ վկայակոչելով սեփական իրազեկ աղբյուրները:

Նշվում է՝ նոր iPad Pro-ն կունենա ապակե հետին պանել, որը թույլ կտա սարքը լիցքավորել անլար եղանակով: Բացի այդ, IPad Pro-ն կարող է հագեցած լինել անլար լիցքավորման գործառույթով, ինչը թույլ կտա դրա միջոցով լիցքավորել ընկերության մնացած սարքավորում ևս՝ պարզապես տեղադրելով դրանք պլանշետի հետևի մասում: Bloomberg-ի աղբյուրները նշում են, որ գործառույթը դեռևս «սաղմնավորման» փուլում է և շատ բան կարող է փոխվել:

Ինչ վերաբերում է IPad Mini-ին, ապա այն կունենա ավելի նեղ էկրան, որը 6 տարվա ընթացքում սարքի դիզայնի առաջին վերափոխումն է: Apple-ը նաև փորձարկում է Home կոճակից ամբողջովին հրաժարման հնարավորությունը: Բացի այդ, ընկերությունն աշխատում է ուսանողների համար նախատեսված բազային iPad-ի ավելի բարակ տարբերակի վրա: Վերջին 2 արտադրանքը նախատեսվում է թողարկել 2021-ի վերջին:

Գործակալության տեղեկություններով՝ Apple-ը ներկայում մշակում է անլար լիցքավորման նոր մեթոդներ, որոնք թույլ կտան սարքը լիցքավորել մեծ հեռավորության վրա, բայց այդ տեխնոլոգիան, ամենայն հավանականությամբ, կներկայացվի միայն մի քանի տարի անց: