Տնտեսությունը կրել է համավարակի և ռազմական դրության բացասական ազդեցություններ, նվազել են ավանդները, վատորակ վարկերի աճ է գրանցվել. ԿԲ նախագահ (տեսանյութ)

Այսօր ՀՀ կենտրոնական բանկի տնօրեն Մարտին Գալստյանը անդրադարձել է 2020 թվականի տնտեսությանը ռազմական դրության և համավարակի պահմաններում:

«Տնտեսությունը կրել է համավարակի և ռազմական դրության բացասական ազդեցությունները՝ սկսած տարվա սկզբից, և 2020 թվականի մարտ ամսից լոքդաունի ռեժիմի մեջ ենք եղել: Սեպտեմբերին էլ ստեղծվեց պատերազմական իրադրություն, որը բարդ իրավիճակի էր հանգեցրել տնտեսությունը, որի արդյունքում 2020 թվականի ընթացքում գրանցվել է -7,4 տոկոս տնտեսական անկում»,- ասաց Մարտին Գալստյանը:

Նա նաև նշեց՝ Կենտրոնական բանկը անդրադարձել է վարկային ռիսկի աճի և իրացվելիության ճնշումների վերաբերյալ հարցերին:

«Վարկային ռիսկի աճի համար ձեռնարկվել են հակացիկլիկ միջոցառումներ, իրացվելիության ճնշումների համար իրացվելիության ներարկում իրականացրեցինք: Սպառողական վարկերի, վատորակ վարկերի կշիռը աճել է, բիզնես և գյուղատնտեսական վարկերի որոշակի աճ է նկատվել»,- նշեց ԿԲ նախագահը:

Նա ընդգծեց, որ 2020-ի սեպտեմբերից արձանագրվել է ավանդների նվազում: «Հոկտեմբեր-նոյեմբեր ամիսներին նկատվել է արտահոսք ավանդների համակարգից, որին նպաստել են համավարակի և ռազմական դրության հետ կապված տնտեսական անորոշությունները»,- ընդգծեց նա:

Մարտին Գալստյանը նաև տեղեկացրեց, որ համավարակի և ռազմական դրության պայմաններում ֆինանսական կազմակերպությունները վերանայել են վարկային պայմանները: «Համավարակի պայմաններում ֆինանսական կազմակերպությունները վերանայել են 1.3 տրիլիոն դրամ մնացորդով շուրջ 980 հազար վարկային պայմանագիր, առցանց ծառայությունները և անկանխիկ գործարքները աճ են գրանցել, ռազմական դրության պայմաններում ֆինանսական համակարգը մոտ 2.5 մլրդ դրամի չափով ներել է Արցախի պատերազմում զոհված անձանց, նրանց հարազատների, նաև հաշմանդամություն ստացած անձանց վարկերը»,- հավելեց ԿԲ նախագահը:

Մարտին Գալստյանը նաև շեշտեց, որ 2021 թվականը ևս հեշտ տարի չի լինելու, քանի որ կան կուտակված խնդիրներ, որոնց ֆինանսական արտացոլումը երևան կգա 2021-ի ընթացքում, նախագահը նաև անդրադարձավ ԿԲ միջամտություններին:

«Կենտրոնական բանկը միջամտություն է անում միայն այն դեպքում, երբ շուկայում ինչ-որ բան խարխլվում է կամ պահանջարկի կամ առաջարկի գնանշումները բացակայում են, կամ ինչ-որ իրադարձություն է տեղի ունենում, որ շուկայի բնականոն գործունեությունը խափանվում է»,- ասաց Մարտին Գալստյանը: