Իրանն այսօր տարածաշրջանում սահմանում է կարմիր գծեր ոչ միայն իր, այլ նաև մեր փոխարեն. Լիլիա Ամիրխանյան (տեսանյութ)

Ակնհայտ է, որ Իրանն ակտիվացել է տարածաշրջանում առհասարակ և հայ-իրանական համագործակցության համատեքստում՝ մասնավորապես՝ առավելապես ուղղված կոմունիկացիոն նախագծերին: Այս մասին «Առավոտյան լուրեր Լիլիթ Թումանյանի հետ» հաղորդման «Հայացք. տնտեսություն» հատվածում ասել է «Հայացք» վերլուծական կենտրոնի փորձագետ Լիլիա Ամիրխանյանը:

«Միևնույն ժամանակ նկատում ենք Իրանի կողմից գործողությունների արագացում, որը սովորաբար օրինաչափ չէ Իրանի համար, և դա ունի և՛ տնտեսական, և՛ քաղաքական գործոններ»,- նշել է նա:

Անդրադառնալով վերջին երկու օրերի ընթացքում հայ-իրանական օրակարգի ակտիվությանը՝ Ամիրխանյանը հիշատակել է ՊԵԿ նախագահի այցն Իրան և այնտեղ ձեռքբերված պայմանավորվածությունները, ինչպես նաև Իրանի Ճանապարհաշինության և քաղաքաշինության նախարարի այցը Հայաստան և այստեղ Էկոնոմիկայի նախարարության հետ ստորագրված հուշագիրը, ինչպես նաև Տարածքային կառավարման և ենթակառուցվածքների նախարարության հետ պայմանավորվածությունները:

Ըստ փորձագետի՝ նախանշված բոլոր նախաձեռնությունները դրական են, բայց առաջանում է հարց՝ որո՞նք են թելադրված հայկական կողմի օրակարգով. «Հայաստանն առհասարակ ունի՞ օրակարգ աշխարհի հետ, մասնավորապես՝ Իրանի հետ: Եթե ունի՝ որն է այդ օրակարգը: Իրան-Հայաստան վերջին զարգացումներում գոնե հրապարակայնորեն չի երևում, որ նշված կետերում կա մեր օրակարգը, մեր նախաձեռնողականությունը»:

Ինչ վերաբերում է Իրանի կողմից ակտիվության մյուս բաղադրիչին, ըստ Լիլիա Ամիրխանյանի, պետք է հաշվի առնել վերջին զարգացումները: «Ադրբեջանցիների մուտքը Հայաստանի տարածք, ՀՀ իշխանությունների կողմից անհասականալի բանակցությունները, նախանշված փաստաթղթի ստորագրումը, որն ինքնին խնդրահարույց է, բաց եթե դրան հավելենք հանգամանքը, որ հնարավոր է՝ կան գաղտնի հավելվածներ, հնարավոր է՝ սա հին տարբերակն է: Այս ամենին գումարած Ադրբեջանի կողմից առաջ քաշվող թեզը, իրենց լեզվով ասած «Զանգեզուրի միջանցքի» հետ կապված, Իրանի մոտ առաջացրել են հստակ մտավախություններ. ՀՀ սահմանին կա խնդիր, այդ թվում՝ կոմունիկացիաների հետ կապված»,- ասել է փորձագետը:

Ըստ նրա, միաժամանակ որքան էլ ցավալի է, մեր հանրության մոտ չկան այդ մտավախությունները: «Իրանն այսօր տարածաշրջանում սահմանում է կարմիր գծեր, ընդ որում ոչ միայն իր, այլ նաև մեր փոխարեն՝ մեր կարմիր գծերը»,- ասել է Ամիրխանյանը: