Ռուսաստանն ու Չինաստանը կձգտեն ընդլայնել իրենց ազդեցությունը Մերձավոր Արեւելքում ԱՄՆ-ի հեռանալու դեպքում. ԱՄՆ գեներալ

Մերձավոր Արեւելքում ԱՄՆ-ի ռազմական ներկայությունը կրճատվելով՝ մրցակցող համաշխարհային գերտերություններ Ռուսաստանն ու Չինաստանը կձգտեն ընդլայնել իրենց ազդեցությունը տարածաշրջանում: Այդ մասին հայտարարել է ԱՄՆ Կենտրոնական հրամանատարությունից գեներալ Գրենք Մակքենզին:

«Ընդհանուր առմամբ Մերձավոր Արեւելքը հզոր գերտերությունների միջեւ ինտենսիվ մրցակցության տարածք է: Եւ ես կարծում եմ, որ տարածաշրջանում մեր դիրքերը փոփոխելու դեպքում Ռուսաստանն ու Չինաստանը շատ ուշադիր կհետեւեն, որպեսզի հասկանան՝ կառաջանա՞ արդյոք վակուում, որը նրանք կարող են օգտագործել»,-ասել է Մակքենզին, հաղորդում է Associated Press-ը: «Ես կարծում եմ՝ նրանք տեսնում են, որ Միացյալ Նահանգները փոխում են իրենց դիրքերը, եւ զգում են, որ այնտեղ կարող է հնարավորություն լինել»,-հավելել է գեներալը:

Ապրիլին նախագահ Ջո Բայդենը հրաման է ստորագրել Աֆղանստանից ԱՄՆ զորքերն ամբողջությամբ դուրս բերելու մասին: Ակնկալվում է, որ այդ գործընթացը կավարտվի սեպտեմբերի 11-ին: Անցած շաբաթ Պենտագոնը հայտարարել էր, որ զորքերը դուրս բերելու հինգերորդ մասն ավարտվել է:

Սաուդցի պաշտոնական անձանց հետ հանդիպումից հետո Մակքենզին հայտարարել էր, որ ոլորտներից մեկը, որը Ռուսաստանն ու Չինաստանը կարող են օգտագործել ԱՄՆ-ի բացակայության դեպքում, կարող է լինել զենքի վաճառքը: Մակքենզիի խոսքով՝ Ռուսաստանը պատրաստ է ցանկացածին վաճառել ՀՕՊ համակարգերը, իսկ Չինաստանն ունի երկարաժամկետ նպատակներ այդ տարածաշրջանում ռազմաբազաներ ստեղծելու հարցում:

AP-ն նշում է, որ Բայդենի վարչախումբը դիտարկում է Մերձավոր Ասիայում Չինաստանի ազդեցության ընդլայնումը՝ որպես ԱՄՆ անվտանգության գլխավոր խնդիր, սակայն ռազմական առաջնորդները, ինչպես Մակքենզին, ասում են, որ Չինաստանի ազդեցությունը չի սահմանափակվի միայն այդ տարածաշրջանով:

«Ես լիովին համաձայն եմ, որ Չինաստանը հիմնական սպառնալիքն է, որը պետք է լինի մեր տեսադաշտում»,-ասել է Մակքենզին: «Միեւնույն ժամանակ մենք համաշխարհային գերտերություն ենք, եւ մենք պետք է գլոբալ աշխարհայացք ունենանք: Իսկ դա նշանակում է, որ մենք հնարավորություն ունենք դիտարկել երկրագունդը՝ որպես մեկ ամբողջություն»: