Արա Զոհրաբյանի գլխավորությամբ քաղաքացիները հանցագործության մասին հաղորդում են ներկայացնում գլխավոր դատախազ Արթուր Դավթյանին
Այսօր՝ մայիսի 24-ին, Արա Զոհրաբյանի գլխավորությամբ քաղաքացիները հանցագործության մասին հաղորդում են ներկայացնում գլխավոր դատախազ Արթուր Դավթյանին, պնդում, որ Նիկոլ Փաշինյանը հրաժարականից հետո չի կարող շարունակել օգտագործել իր լիազորությունները, հետևաբար՝ չի կարող ստորագրել նաև Հայաստանի սահմանների ճշգրտման հետ կապված որևէ փաստաթուղթ։
«Դուք լրագրողներ եք, լուսաբանման միջոցով եք փորձում այս հարցին հնչեղություն հաղորդել, լուծում տալ, ես փաստաբան եմ , հետևաբար՝ իմ մասով եմ փորձում գործողություններ ձեռնարկել»։ Այս մասին քիչ առաջ ՀՀ գլխավոր դատախազության շենքի մոտ մեկնարկած ակցիայի ժամանակ լրագրողների հետ զրույցում ասաց «Զարթոնք» ազգային քրիստոնեական կուսակցության գործադիր մարմնի պատասխանատու Արա Զոհրաբյանը։
«Պետք է մարդկանց արթնացնել։ Բոլորս մեզնից կախված ամեն բան պետք է անենք, որպեսզի այս փաստաթուղթը չստորագրվի։ Եթե ես, փաստաբան լինելով, իմ աշխատանքը թողել եմ , այսպիսի ակցիաների եմ մասնակցում ու նույնիսկ նախաձեռնում, դա ցույց է տալիս , որ այդ օպտիմիստական կարգավիճակից դուրս եմ եկել։ Ես հավատում եմ մեր ազգի էն քնած ուժին, որին պիտի բոլորով արթնացնենք։ Պիտի մարդկանց արթնացնենք ,ցույց տանք, որ որեւէ տրամաբանության մեջ չի մտնում այսպիսի փաստաթղթի ստորագրումը։ Որովհետև չունի լեգիտիմություն, իրավական առումով խնդիրներ կան։ Նախկինում խոսում էինք Ադրբեջան-Արցախ հակամարտության մասին, իսկ հիմա իրենք հստակ ներխուժել են մեր տարածք։ Ցավոք, այսօր մինչեւ հիմա էլ հրապարակային դաշտում սևի ու սպիտակի թեմաներ են քննարկվում»,- ասաց Զոհրաբյանը։