Կարեն Գիլոյան. Սպորտային վաշտը կվերաբացվի
ԿԳՄՍ փոխնախարար Կարեն Գիլոյանն այսօր ամփոփել է պաշտոնավարման անցած 5 ամիսը:
Խոսքի մեջ Գիլոյանն անդրադարձավ ու կարևորեց այն փաստը, որը 40 մլն դրամ է տրամադրվել սպորտային դեղորայքի ձեռքբերմանը, որն էլ տրամադրվել է 15 ֆեդերացիայի: 15 մլն դրամ ստացել է ծանրամարտի ֆեդերացիան, 9 մլն դրամ՝ ըմբշամարտի ֆեդերացիան:
Փոխնախարարը տեղեկացնում է, որ շուտով կվերաբացվի սպորտային բժշկության կենտրոնը, որը գտնվում է Սուրբ Գրիգոր Լուսավորիչ Բ/կ-ի պոլիկլինիկայում և ամբողջությամբ առանձնացված է լինելու մարզիկների համար: Այդ կենտրոնից կկարողանան անվճար օգտվել բոլոր մարզաձևերի բոլոր հավաքականների անդամները: Բժշկական կենտրոնը համալրված է նորագույն տեխնոլոգիաներով, և այդ գործընթացը շարունակական է լինելու: Եթե մարզիկները վիրահատությունների կարիք ունեն, ապա բժշկական կենտրոնի տրամադրած ուղեգրով Հայաստանի տարբեր բժշկական կենտրոններում անհրաժեշտ միջամտությունները կկատարվեն:
Գիլոյանը կարևորում է նաև սպորտային վաշտի վերաբացման մասին լուրը՝ ընդգծելով, որ դրա անհրաժեշտությունն ամենից շատ նկատվեց covid-19-ի պայմաններում, քանի որ այդ ընթացքում պատանի ու երիտասարդ մարզիկները ոչ մի մրցաշարի չմասնակցեցին ու չկարողացավ ապահովել բանակից տարկետումը, իսկ այս պարագայում խոստումնալից մարզիկները կկարողանան ծառայել սպորտային վաշտում ու նաև մարզվել:
Կվերաբացվի նաև Բարձրագույն վարպետության դպրոցը: Այն հնարավորության կտա երիտասարդական տարիքից դուրս եկած մարզիկներին օրինական գրանցում ունենալ, իսկ նրանց մարզիչներին օրինական աշխատավարձ կտրվի:
Կառավարությունն ընդառաջել է, և այսուհետ մարզիկների անվանական թոշակները չեն հարկվելու: Այդ թոշակները ստանում են Եվրոպայի, աշխարհի առաջնություններում մեդալակիր դարձած մարզիկները, նրանց անձնական մարզիչները, հավաքականի գլխավոր մարզիչները, երկրորդ մարզիչները, մերսողներն ու բժիշկները: Նաև կա նախագիծ, ըստ որի վերահաշվարկ կկատարվի ու նախկինում գանձված գումարները կվերադարձվեն: