Պետական պաշտոններ զբաղեցնողների համար պետք է վերջնաժամկետ սահմանվի 48 կամ 72 ժամ․ եթե չեք լքում դահիճների խմբակը, հաջորդ իշխանությունն իր պարտքը պետք է համարի, որ հայտնվեք դատարանում. Կարեն Բեքարյան
Դիմում եմ մեր պետական համակարգին՝ անհնար էր այսքան ժամանակ չհասկանալ, որ դուք պետությանը չեք ծառայում, այլ ծառայում եք Հայաստանում հայտնված օկուպացիոն ռեժիմի և ձեր ծառայությամբ Հայաստանը տապալում եք մինչև վերջ: Հետևաբար ո՞ւր է ձեր ձայնը, բողոքը, հանրային խոսքը,- այս մասին մայիսի 16-ին «Նիկովիդ 18. Ախտորոշում և բուժում» խորագիրը կրող քննարկման ժամանակ ասել է հասարակական-քաղաքական գործիչ Կարեն Բեքարյանը:
«Բանակը, որին սիրել և փայփայել ենք և ասել, որ մեր կայացած կառույցն է, հիմա կայացած կառույց է նրանով, որ Գլխավոր շտաբի ողջ պատերազմը պետը հանդուրժի՝ հասկանալով իրեն ուր են տանո՞ւմ, հետո էլ դատարանի դռներով վազի՞: Գեներալիտե՛տ, Գլխավոր շտաբի ակնկալիքները մեզնից ու քեզնից ի՞նչ չափով ես բավարարել, ե՞րբ է բավարարելու օրը, որ թշնամի՞ն է ուսադիրներդ պոկելու: ԱԱԾ «ֆեյք», սատանա ման եկող, բռնող սահմանապահ զորքերի գլխին կանգնած ԱԱԾ, դու քո տնօրենին կարողանո՞ւմ ես հանդուրժե՞լ, հանդուրժե՞լ նրանց, ովքեր այս ամեն ինչին մասնակցություն ունեն: Ես չէի պատկերացնի երբեք, որ դիվանագետներ բառը կարտասանեմ զզվանքով, որովհետև դիվանագետի իր երկրի շահի համար պայքարողը և այն, ինչ մենք ունենք, ոչ մի կապ իրար հետ չունի»,– ասաց նա:
Կարեն Բեքարյանը, անդրադառնալով պետական համակարգում աշխատող անձանց, նշեց, որ նրանք պետք է նրանց համար վերջնաժամկետ ներկայացվի, որ նրանք լքեն իրենց պաշտոնները.
«Կարծում եմ պետական համակարգի աշխատողների համար, առավել ևս պաշտոն զբաղեցնողների համար պետք է ինչ-որ վերջնաժամկետ սահմանվի և շատ կարճ՝ օրինակ 48, ժամ, 72 ժամ, որ եթե դուք հայտարարությամբ հանդես չեք գալիս և չեք լքում այս դահիճների խմբակը կամ դրանց ծառայելը, ցանկացած հաջորդ իշխանություն, կապ չունի՝ ով կլինի ընդհանրապես իր առաջին՝ հոգու պարտքը պետք է համարի, որ դուք հանցավոր գործունեության կամ անգործության, էլ չասեմ հայրենիքի դավաճանությանը օժանդակելու հոդվածներով հայտնվեք դատարաններում: Եթե ձեր սարսափը աշխատավարձ, պարգևավճար գործուղում կորցնելն է, լրատվամիջոցները թող ունենան թեժ գծեր, որ ամեն հայտարարություն անող զանգի և իր տվյալները թողնի, որ վաղը, անարժան լինելով, բայց վերականգման հույս ունենաք»:
Կարեն Բեքարյանը, անդրադառնալով ընտրությունների սպասող քաղաքական ուժերին, նշեց, որ պետք է հավաքվեն և որոշեն ինչ քայլեր և գործողություններ պիտի անեն հիմա թե՛ երկրի ներսում, թե՛ սուբյեկտայնությունը կորցրած Հայաստանի ձայնը բարձրացնելու դրսում։
«Կհասկանան ձեր ձայնը, կարող եք ձևակերպել, կարո՞ղ է այդ կամքը ցուցաբերեք: Այսքան ժամանակ մեր երևելի դեմքերից սպասում էինք արագ արձագանք կործանվող երկրին ու չէինք ստանում, հիմա կարո՞ղ է այդ արձագանքը ջրի երես գա, ձեր դիմումները և միասնական կամքը տեսնենք: Սա կոչ, խնդրանք ու պահանջ է այն քաղաքական ուժերին, ում ուշքնումիտքը քանի շտաբ բացելն է և այլն»: