ՀԱՄԱՍ-ի դեմ ռազմական արշավը կարող է ապահովել Նեթանյահուի կառավարությանն անհրաժեշտ թթվածին, իսկ հնարավոր սցենարը կարող է դառնալ հերթական պատերազմը Գազայի հատվածում. Ալ. Ցինկեր

Իսրայելի խորհրդարանի՝ Քնեսեթի նախկին պատգամավոր Ալեքսանդր Ցինկերի խոսքով՝ Երուսաղեմում վերջերս տեղի ունեցած անկարգություններն անմիջականորեն կապված են Պաղեստինյան ինքնավարությունում նախատեսված ընտրությունների հետ:

Նա Tert.am-ի հետ զրույցում նշեց՝ Պաղեստինի ղեկավար Մահմուդ Աբբասի որոշմամբ՝ ընտրությունները հետաձգվել են անորոշ ժամանակով, ինչը դուր չի եկել ՀԱՄԱՍ-ի ղեկավարությանը, որը, ըստ հարցումների, կարող էր հաղթել ընտրություններում և իշխանության գալ ոչ միայն Գազայի հատվածում, այլև ընդհանրապես Պաղեստինյան ինքնավարությունում:

«Մահմուդ Աբբասը, հասկանալով, որ Իսրայելի կառավարությունը թույլ չի տա ՀԱՄԱՍ-ի նախընտրական արշավը Երուսաղեմում, դա օգտագործեց որպես պատրվակ ընտրությունները հետաձգելու համար: Որպես պատճառ ընտրվեց Ռամադանի տոնակատարության ժամանակ առաջացող կրքերի բորբոքումը,- նշեց նա՝ մատնանշելով, որ այս անգամ, բացի սովորական բախումներից, եղան նաև անկարգություններ Շեչեմի դարպասի մոտ, տաճարի լեռան ցույցեր և Ալ Աքսայի մոտ ցուցարարների և սահմանապահների արյունալի բախումներ,- ՀԱՄԱՍ-ը միացավ առճակատմանը՝ Երուսաղեմի դեմ պատերազմ սկսելու կոչով»:

Երուսաղեմի ցույցերին, ըստ իսրայելցի գործչի, ավելացան Թուրքիայում, ինչպես նաև՝ Լիբանանում և Սիրիայում պաղեստինցի փախստականների ճամբարներում ցույցերը:

«Իրանում տեղի ունեցավ նաև ցույց Ալ Ակսային սատարելու համար, և հիմա Թեհրանի և Անկարայի պաշտոնյաներից կարելի է լսել՝ «Մուսուլմաններ, պայքարեք Երուսաղեմի համար» կոչը։ Էրդողանն անգամ մի քանի բառ եբրայերեն է սովորել, որ անձամբ քննադատի Իսրայելին»,- ասաց նա։

Մահմուդ Աբբասը, ըստ Ալեքսանդր Ցինկերի, հասավ իր նպատակին. Պաղեստինյան ընտրությունները հետաձգվեցին անորոշ ժամանակով: «Ինչպե՞ս կարող են ընտրություններ անցկացնել, երբ Երուսաղեմում «չար սիոնիստները կրկին ոտնատակ են տալիս մեր Ալ Աքսան»»,- մատնանշեց Մահմուդ Աբբասի խոսքերը նա՝ հավելելով նաև, որ այնուամենայնիվ, Պաղեստինի ղեկավարի ավանտյուրան շարունակվեց:

Ըստ նրա՝ ՀԱՄԱՍ-ն օգտվեց իրավիճակից՝ ներկայանալով որպես Երուսաղեմի և Ալ Աքսա մզկիթի պաշտպան, ինչը կփրկի պաղեստինցիների կորցրած պատիվը: «ՀԱՄԱՍ-ը, որը դարձավ իրավիճակի դրդապատճառը, կարողացավ այրել քաղաքը, գնաց ավելի հեռու, քան պետք էր»,- ասաց նա։

Ցինկերի խոսքով՝ ՀԱՄԱՍ-ը վերջնագիր ներկայացրեց Իսրայելին`«իր ուժերը դուրս բերել Շեյխ Ժարրայից և Տաճարի լեռից», և երբ ժամկետն ավարտվեց, սկսեց հրթիռային հարձակումները Երուսաղեմի վրա: «Նա, կարծես, հասավ ցանկալի հաղթանակի, բայց թե ով է հաղթողը, դեռ վաղ է ասելը»,- ասաց նա։

Ըստ ամենայնի, ըստ նրա, ՀԱՄԱՍ-ը հույսը դրել էր Իսրայելի ցանկության վրա`արագորեն դադարեցնելու հրթիռային դիմակայությունը: «Դա սխալ հաշվարկ էր: ՀԱՄԱՍ-ի դեմ երկարատև ռազմական արշավը կարող է ապահովել Նեթանյահուի կառավարությանը անհրաժեշտ թթվածին: Այդ պատճառով ես չեմ բացառում, որ Գազայի հատվածում հերթական պատերազմը կարող է դառնալ հնարավոր սցենարը»,- ասաց նա։

Հիշեցնենք, որ լարվածությունը Արևելյան Երուսաղեմում սկսել է աճել ապրիլի կեսերից, իսկ մայիսի 7-ին իսրայելական սահմանապահ ոստիկանության և պաղեստինցիների բախումները սկսվել են միանգամից երկու վայրում՝ Տաճարի լեռան և Շեյխ Ժարրայի շրջանում, որտեղ դատարանի որոշման համաձայն` Իսրայելի անվտանգության ուժերը վտարում են արաբական մի քանի ընտանիքների, ինչն ուղեկցվում են տեղի բնակչության բողոքներով և բռնի բախումներով: