Գործադուլ չենք արել, առավոտյան վառելիք չենք ունեցել, չենք աշխատել. տեխնիկական խնդիր է` ասել են կլուծվի. ավտոբուսի վարորդների մեծ մասը կեսօրին արդեն վերսկսել է աշխատանքը (տեսանյութ)
Եկել եմ աշխատանքի, վառելիք չի եղել, չեմ կարողացել գիծ դուրս գալ։ Մենք ոչ բողոքի ակցիա ենք արել, ոչ էլ գործադուլ։ Այս մասին լրագրողների հետ զրույցում ասաց Ջրվեժի ավտոպարկի ավտոբուսի վարորդներից մեկը՝ անդրադառնալով այն խնդրին, որ առավոտյան վարորդների մի մասը չի աշխատել՝ վառելիքի բացակայության պատճառով։
«1-2 օր է, ինչ այս խնդիրը կա։ Մեզ տեղեկացրել են, որ քաղաքապետարանում այդ հարցով արդեն զբաղվում են։ Մոտ 100 վարորդ այսօր չի սպասարկել։ Մի մասին արդեն մատակարարել են վառելիք, իրենք սկսել են աշխատանքը, մի փոքր մասն էլ սպասում է վառելիքի»։
Վարորդները շեշտեցին, որ իրենց խոստացել են կարգավորել խնդիրը։
Ավտոպարկում էր նաև Երևանի քաղաքապետարանի տրանսպորտի վարչության պետ Էդգար Գալստյանը, ով ասաց, որ վառելիքի մատակարարման հետ կապված տեխնիկական խնդիր է եղել, հիմա փորձում են լուծել այդ խնդիրը՝ հորդորելով մանրամասների համար դիմել լրատվական վարչություն։
«Մենք ունենք իրավաբանական վարչություն, մատակարարման խնդրի հետ կապված հարցերը կքննարկենք, պայմանագիրը կուսումնասիրվի, կհասկանանք՝ ինչ խնդիր է, օրենքով կլուծվի»։
Մանրամասները՝ տեսանյութում։