Բիլ Գեյթսը պատվաստանյութերն անվանել է մարդկության պատմության մեծագույն գիտական նվաճում
Microsoft կորպորացիայի հիմնադիր Բիլ Գեյթսը մարդկության պատմության ամենամեծ գիտական նվաճումը համարում է պատվաստանյութերը: Այս մասին նա ասել է ուրբաթ հրապարակված Handelsblatt թերթին տված հարցազրույցում, գրում է ТАСС-ը:
«Այն ամենի լույսի ներքո, ինչի միջով անցանք անցյալ տարի, նախ պետք է ասեմ՝ պատվաստանյութերը: COVID-19-ի դեմ պատվաստանյութերը մեծ հույս տվեցին, որ այս տարի կհաղթահարենք համավարակը», - ասել է Գեյթսը ի պատասխան այն հարցի, թե իր կարծիքով՝ որոնք են մարդկության պատմության երեք ամենակարևոր նորարարությունները:
«Չնայած դրան [համավարակին] պատվաստանյութերը կարողացել են հաղթահարել բազմաթիվ հիվանդություններ»,- հավելել է նա:
Երկրորդ տեղում Microsoft-ի հիմնադիրը նշում է միկրոպրոցեսորի գյուտը: «Անշուշտ ձեզ չի զարմացնի, որ ես այն միկրոպրոցեսորի հսկայական երկրպագուն եմ, որն ի վերջո հնարավոր դարձրեց անհատական համակարգիչը, հեղափոխեց համակարգչային գիտությունը և սկսեց տպավորիչ նորարարական ալիք վերջին 50 տարիների ընթացքում»,- ասել է նա:
«Վերջապես, ես ընտրում եմ կանաչ հեղափոխությունը (Խմբ.՝ 1940-ականների և 1970-ականների գյուղատնտեսության մեջ կատարված փոփոխությունների մի ամբողջ շարք, ինչը հանգեցրեց համաշխարհային գյուղատնտեսական արտադրանքի ծավալների զգալի աճի)», - ասել է Գեյթսը: Նա կարևորել է ամերիկացի գյուղատնտես Նորման Բորլաուգի հետազոտությունները (1914-2009):
«Դրանից առաջ անհնար էր պատկերացնել, թե ինչպես կարելի է բավարար քանակությամբ սնունդ արտադրել ամբողջ աշխարհի բնակչության համար: Ըստ տարբեր գնահատականների, Բորլաուգի աշխատանքը ավելի քան 1 միլիարդ մարդու փրկեց սովից», - ասել է Գեյթսը: