ՄԻՊ ինստիտուտին հարվածելով՝ վտանգում եք մեր պետության շահերը և ուշացնում գերիների վերադարձը. ձեզ ցուցադրելու, ձեր թեկնածուին առաջ բրդելու համար չարժե գնալ արկածախնդրության. Ա. Գասպարյանը՝ իշխող ուժին

Հայաստանում քիչ կլինեն ռացիոնալ մարդիկ, որոնք կվիճարկեն այն արդյունավետ աշխատանքը, որ կատարել ու շարունակում է կատարել ՄԻՊ-ի ինստիտուտը՝ կապված հայ ռազմագերիների տունդարձի, նրանց թվի ճշտման, պայմանների բարելավման, միջազգային գործընկեր կառույցների հետ: Ընդ որում՝ պատերազմի օրերին այդ աշխատանքի բեռը հավասարապես տանում էր նաև Արցախի մարդու իրավունքների պաշտպանի գրասենյակը, որը, հասկանալի պատճառներով, հետպատերազմյան շրջանում դարձավ անատամ: Այս մասին «Երեկոյան լուրեր Աբրահամ Գասպարյանի հետ» հաղորդման ընթացքում ասել է Աբրահամ Գասպարյանը։

Գասպարյանը նշել է՝ ՄԻՊ ինստիտուտը կատարում է հսկայական աշխատանք և հատկապես այս շրջանում նրան թիրախ դարձնելը չի բխում Հայաստանի, Արցախի ու հայ ժողովրդի ազգային-պետական շահերից: «Ի վերջո՝ ճիշտ չէ, որ Հայաստանի պետական պաշտոնյային հարվածում են հավասարապես՝ Հայաստանի իշխանությունն ու Ադրբեջանը, կամ էլ հակառակը՝ տարօրինակ կլիներ, եթե Հայաստանի ղեկավարի քայլերը հավասարապես գովեին նրա թիմակիցներն ու թշնամի պետությունը: Նման վիճակում, ցավոք, մենք վաղուց ենք հայտնվել, երբ Նիկոլ Փաշինյանին հավասարապես խրախուսում են իր գույնզգույն ուսապարկերը, Ադրբեջանի և Թուրքիայի նախագահները, Մարդու իրավունքների պաշտպան Թաթոյանին էլ հավասարապես փնովում են «Իմ քայլ»-ի պատգամավորներն ու Ադրբեջանի իշխանությունը: Ասիմետրիկ մոտեցումների հիմքը պարզ է՝ Թաթոյանի ու թիմի քրտնաջան աշխատանքը խանգարում է երկուսին էլ՝ թե՛ Հայաստանում, թե՛ Ադրբեջանում»,-նշել է Գասպարյանը:

Գասպարյանը անդրադարձել է ՄԻՊ տարեկան հաշվետվության ներկայացմանը ԱԺ-ում և նշել՝ սա քաղաքական կռիվ է. «Սա իշխանություն պահելու կռիվ է և որքան էլ տարբեր գնահատականներ տանք այս կամ այն պաշտոնյայի ու պատգամավորի պահվածքին ու կարծիքին, այդուհանդերձ՝ պիտի հասկանանք, որ ՄԻՊ-ի դերը թուլացնելով՝ պետությանն օգուտ չենք տա: Պարզ ասած՝ մեր պետության շահից չի բխում, մեր ռազմագերիներն էլ ավելի շուտ չեն վերադառնա, եթե խորհրդարանում նվաստացնենք ռազմագերիների հարցով զբաղվող ինստիտուտի գործունեությունը»

Հեռուստամեկնաբանը նշել է՝ ՄԻՊ գրասենյակը հսկայական աշխատանք է կատարում և եթե իշխանությունը սա չի ուզում տեսնել կամ միտումնավոր անտեսում է, ուրեմն չՀայաստանի ջրաղացին է ջուր լցնում: «Իշխանությունն այսօր փորձում է ցեխ շպրտել կամ նույնն է՝ թերագնահատել Արման Թաթոյանի ու նրա ղեկավարած ինստիտուտի աշխատանքը: Սա նշանակում է, որ իշխանությունը տրոյական ձի է Ադրբեջանի համար: Ես խոսում եմ ՄԻՊ Արման Թաթոյանի, ոչ թե անհատի մասին: Մեր շահերը պաշտպանողն ու ներկայացնողն իրավունք չունի խոչընդոտների հանդիպել ներսում: Մենք դա պիտի թույլ չտանք: Չեմ գերագնահատում ՄԻՊ-ի գրասենյակի բարեխիղճ ու օրինական աշխատանքը, նրա դերը: Թաթոյանի ղեկավարած գրասենյակի աշխատանքը դարձավ ավելի ակնառու, քանի որ Փաշինյանն այդպես ուզեց, քանի որ վարչապետի աթոռն զբաղեցնողը իմաստազրկեց պետություն հասկացությունը, պարալիզացրեց ինստիտուտների գործունեությունը: Իշխանությունը 3 տարում կազմաքանդեց պետությունը, ինստիտուցիոնալ փխրուն աշխատանքը կենտրոնացրեց անձի շուրջ, ստեղծեց անհատի պաշտամունքի ավանդույթ: Այդ անհատը տապալեց ամեն ինչ: Հիմա ինչ՝ իշխանությունն ու ուսապարկերը կարծում են, որ պետության մեջ իսպառ վերացե՞լ են առողջ օղակները, որոնք կհամարձակվեն գնահատական տալ կամ դեմ գնալ իշխանության գործողություններին: Այդ մտածողությունը կոչվում է ստրկամտություն, որը բնորոշ է այն մարդկանց, որոնք տառապում են անհատի պաշտամունքով, աթոռի վերարտադրության համար հոգին հանել են աճուրդի, քաղաքականության մեջ հայտնվել են ընդամենը քայլելով»,- ասել է Գասպարյանը:

Նա անդրադարձել է նաև ՄԻՊ-ի՝ միջազգային «A» կարգավիճակին, և ընդգծել՝ դա նպաստում է, որ նրա ձայնն ու ՀՀ-ին վերաբերող խնդիրներն ավելի լսելի դառնան:

Նա դիմել է իշխանության ներկայացուցիչների՝ ասելով, որ ՄԻՊ ինստիտուտին հարվածելով՝ իրենք վտանգում են մեր պետության շահերը և ուշացնում մեր գերիների վերադարձը: «Ձեզ ցուցադրելու, ձեր տոտեմ Փաշինյանի մոտ աչոկ հավաքելու, ՄԻՊ-ի ձեր ունեցած թեկնածուին առաջ բրդելու համար չարժե գնալ նման արկածախնդրության: Ձեր ղեկավարն արդեն իսկ ազգակործան քաղաքականությամբ, հախուռն ու չհաշվարկված քայլերով, ապոլիտիկ վարքաբանությամբ մի ամբողջ պետության ու ժողովրդի անվտանգություն է տապալել: Թողեք մարդիկ աշխատեն՝ ձեր սիրած նախադասությունն եմ հիշեցնում»,- եզրափակել է Գասպարյանը: