Իմ ու դատավոր ընկերներիս նկատմամբ եղել է որոշակի վերահսկողություն՝ օպերատիվ հետախուզական գործողություններ․ այդ պրոցեսները ոչ մեկին հաճելի չեն, այդ թվում՝ ինձ․ Վազգեն Ռշտունի

Դատավոր Մխիթար Պապոյանի կողմից ներկայացվել էր հաղորդում այն հրապարակումների վերաբերյալ, թե իբր մենք՝ իմ ընկերական շրջապատը, որ դատավորներ են, մասնակցել են հանրապետության երկրորդ նախագահի դատական ակտը գրելու պրոցեսին՝ միջամտել ենք։ Այս մասին լրագրողների հետ ճեպազրույցում ասաց Վերաքննիչ քրեական դատարանի նախագահ Վազգեն Ռշտունին՝ անդրադառնալով այն հրապարակումներին, թե առաջին ատյանի դատարանի դատավոր Դավիթ Գրիգորյանի կողմից «Մարտի 1»-ի գործով այժմ արդարացված Ռոբերտ Քոչարյանի խափանման միջոց կալանքը վերացնելու մասին որոշումը գրել են երեք դատավորներ:

«Դրա հետ կապված եղել են պրոցեսներ, արդեն իսկ ունենք մեր կոլեգաների կողմից բողոքարկված դատական ակտեր, ինչի արդյունքում պարզ է դառնում, որ մեր նկատմամբ եղել է որոշակի վերահսկողություն՝ օպերատիվ հետախուզական գործողություններ։ Այդ պրոցեսները, բնականաբար, ոչ մեկին հաճելի չեն, այդ թվում՝ ինձ։ Օրինակ՝ Դուք խարդախության մասին հաղորդում տաք, բայց Ձեր տանը խուզարկություն կատարեն»,- ասաց նա՝ նշելով, թե ճիշտ է՝ հիմք հանդիսացել է Պապոյանի հաղորդումը, բայց վերահսկողության տակ են վերցվել անձինք, որոնց վերաբերյալ մամուլում ինչ-որ հրապարակում է եղել։

«Ես նորմալ չեմ գնահատում այդ պրոցեսը, հիմա իրավական ընթացակարգերի շրջանակներում ինչ-որ պրոցեսներ են ընթանում, ինձ թվում է՝ ժամանակի ընթացքում ամեն ինչ պարզ կդառնա»,-ասաց Ռշտունին։

Հիշեցնենք, որ 2019-ին դատավոր Դավիթ Գրիգորյանի կողմից ՀՀ երկրորդ նախագահ Ռոբերտ Քոչարյանի խափանման միջոց կալանքը փոխելու որոշման հրապարակումից հետո մամուլում տեղեկություն տարածվեց, թե այդ որոշումը գրվել է ոչ թե Դավիթ Գրիգորյանի, այլ դատավորներ Վազգեն Ռշտունու, Մխիթար Պապոյանի եւ Արշակ Վարդանյանի կողմից։