ԲԴԽ առաջնային առաքելություններից է դատավորներին պաշտպանելը, ոչ թե նրանց նկատմամբ լրացուցիչ լծակներ ձեռք բերելը․ ԲԴԽ լիազորություններն ընդլայնող օրինագիծը բացասական եմ գնահատում․ Վազգեն Ռշտունի

Շատերի անունից կարող եմ ասել, որ այդ օրենքը շատ բացասական գնահատականի է արժանացել, մենք էլ ԲԴԽ անդամներին ներկայացրել ենք այդ բացասական կարծիքը։ Այս մասին լրագրողների հետ ճեպազրույցում ասաց Վերաքննիչ քրեական դատարանի նախագահ Վազգեն Ռշտունին՝ անդրադառնալով ԲԴԽ լիազորություններն ընդլայնող օրինագծին։

Հիշեցնենք, որ օրինագծով դատավորին կարգապահական պատասխանատվության ենթարկելու համար ՀՀ արդարադատության նախարարից և Դատավորների ընդհանուր ժողովի էթիկայի և կարգապահական հարցերի հանձնաժողովից բացի, ԲԴԽ-ին դիմելու իրավունք կունենան նաև ֆիզիկական և իրավաբանական անձինք՝ իրենց մասնակցությամբ կոնկրետ գործերով, եթե առերևույթ առկա է էական կարգապահական խախտման որոշակի հիմք:

«Վարույթ հարուցող երկու սուբյեկտ կա՝ արդարադատության նախարարը և մեր կարգապահական հանձնաժողովը, և չեմ հասկանում, թե երրորդ սուբյեկտն ավելացնելու իմաստը որն է։ Չեմ կարծում՝ ԲԴԽ նպատակն է ավելացնել ազդեցության լծակները դատավորների նկատմամբ, ԲԴԽ առաջնային առաքելություններից մեկը դատավորներին պաշտպանելն է, ոչ թե նրանց նկատմամբ լրացուցիչ լծակներ ձեռք բերելը»,-ասաց նա։

Անդրադառնալով օրենքի այն փոփոխությանը, որը հնարավորություն է տալիս մի դատավորի վարույթում գտնվող գործը փոխանցել մեկ այլ դատավորի, Ռշտունին արձագանքեց, որ, կարծես, ձևավորվում է ցանկալի և ոչ ցանկալի դատավորների ինստիտուտ։

«Կարծես ստացվում է մի իրավիճակ, որ դատավորի նկատմամբ վստահության խնդիր կա, եթե ԲԴԽ-ն գործը որպես բարդ գործ հանձնի մեկ այլ դատավորի, կողմի մոտ այդ դատավորի նկատմամբ անվստահություն է առաջացնելու»,-նշեց նա։

Անդրադառնալով այն հանգամանքին, որ ԲԴԽ նախագահի պաշտոնում Ռուբեն Վարդազարյանին փոխարինում է Գագիկ Ջհանգիրյանը, քանի որ Վարդազարյանի նկատմամբ քրեական գործով վարույթ է սկսվել, և, ըստ որոշ պնդումների, իշխանության նպատակն այն է, որ կարողանա Ջհանգիրյանի միջոցով դատավորներին կառավարել, Ռշտունին արձագանքեց, որ եթե դատավորները չցանկանան, որևէ մեկի միջոցով հնարավոր չէ նրանց կառավարել։

«Վարդազարյանի հետ կապված պրոցեսներ են ընթանում Առաջին ատյանի դատարանում, իմ կանխատեսմամբ՝ դրանք հայտնվելու են նաև Վերաքննիչ դատարանի տիրույթում, դրա համար այդ պրոցեսներին իմ կողմից գնահատական տալը ճիշտ չէ։ Բայց, բնականաբար, ոչ մեկի համար, այդ թվում՝ իմ, հաճելի չէ, որ նման պրոցեսներ են տեղի ունենում դատական իշխանությունում։ Ինձ ու իմ կոլեգաների համար հաճելի չէ, որ քրեական վարույթ է սկսվում այս կամ այն դատավորի նկատմամբ։ Եթե վարույթն օրինական է, դրա դեմ ոչինչ չունենք, բայց երբ կա արհեստականություն, բնականաբար ընդունելի երևույթ չէ, բայց օրինակա՞ն է, թե՞ ոչ, այս պահին չեմ կարող պատասխանել»,-ասաց Ռշտունին։