ԱՄՆ դաշնային ռեգիստրում հրապարակվել է Ադրբեջանին ռազմական օգնության ցուցաբերումը թույլատրող ակտի տեքստը
Միացյալ Նահանգների դաշնային ռեգիստրում հրապարակվել է երկրի «Ազատության աջակցության ակտի» 907-րդ ուղղման կասեցումը, որի արդյունքում թույլատրվում է ԱՄՆ-ի կողմից ուղիղ ռազմական օգնությունն Ադրբեջանին այնքան ժամանակ, քանի դեռ պետքարտուղարը հավաստում է, որ նման օգնությունը չի նպաստում Լեռնային Ղարաբաղում հակամարտության սրմանը:
Նշենք՝ ակտի մասին հայտնի էր դարձել դեռևս ապրիլի 23-ին:
ԱՄՆ պետքարտուղար Էնթոնի Բլինկենի ստորագրած «Ազատության աջակցության ակտի» 907-րդ ուղղման կասեցման մեջ, մասնավորապես, նշված է.
«Ղեկավարվելով 2002 թ. արտաքին գործառնությունների, արտահանման ֆինանսավորման և հարակից ծրագրերի հատկացումների մասին օրենքի երկրորդ մասում պարունակվող լիազորություններով և հարակից օրենքներով` սույնով որոշում և հաստատում եմ, որ Ադրբեջանի նկատմամբ «Ազատության աջակցության ակտի» 907-րդ ուղղման կասեցման երկարացումը.
Անհրաժեշտ է միջազգային ահաբեկչությանը հակազդելու ԱՄՆ ջանքերին աջակցելու համար կամ
Անհրաժեշտ է Միացյալ Նահանգների զինված ուժերի կամ կոալիցիայի գործընկերների գործնական պատրաստությանն աջակցելու համար`միջազգային ահաբեկչությանը հակազդելու համար կամ
Կարևոր է Ադրբեջանի սահմանների անվտանգության համար և
չի խաթարի կամ խոչընդոտի Հայաստանի և Ադրբեջանի միջև խաղաղ կարգավորման շուրջ բանակցությունների շարունակական ջանքերին կամ չի օգտագործվի Հայաստանի դեմ հարձակողական նպատակներով
Ըստ այդմ, ես սույնով ընդլայնում եմ «Ազատության աջակցության ակտի» 907-րդ ուղղման կասեցման երկարացումը: Այս որոշումը պետք է հրապարակվի Դաշնային ռեգիստրում, իսկ որոշումն ու հաստատման հուշագիրը տրամադրվեն Կոնգրեսի համապատասխան հանձնաժողովներին»:
Հիշեցնենք, որ գործող նախագահ Ջո Բայդենը Դեմոկրատական կուսակցության նախագահի թեկնածու եղած ժամանակ Հայաստանի հետ ռազմական գործողությունների սկզբում քննադատել էր Ադրբեջանին՝ հայտարարելով, որ Բաքուն է հրահրել ռազմական գործողությունները և կոչ էր արել նախկին նախագահ Թրամփին արգելափակել Ադրբեջանին ռազմական օգնությունը, մասնավորապես, չհրաժարվել «Ազատության աջակցության ակտի» պահանջներից։ Սակայն վերջերս Բայդենը Կոնգրեսին տեղեկացրել էր, որ իր վարչակազմը երկարացնում է «Ազատության աջակցության ակտի» 907-րդ ուղղման կասեցումը, որի արդյունքում թույլատրվում է ԱՄՆ-ի կողմից ուղիղ ռազմական օգնությունն Ադրբեջանին այնքան ժամանակ, քանի դեռ պետքարտուղարը հավաստում է, որ նման օգնությունը չի նպաստում Լեռնային Ղարաբաղում հակամարտության սրմանը:
«Ազատության աջակցության ակտի» 907-րդ ուղղումն ԱՄՆ Կոնգրեսն ընդունել է 1992 թվականին Ադրբեջանի կողմից Հայաստանի շրջափակման պատճառով և նախատեսում է Ադրբեջանին միայն մարդասիրական օգնության տրամադրում: Ըստ այդ ուղղման ԱՄՆ կառավարությանն արգելվում է օգնություն ցուցաբերել Արդբեջանի պաշտոնական կառույցներին, քանի դեռ այդ երկիրը «ակնհայտ քայլեր չի ձեռնարկել ՀՀ և Լեռնային Ղարաբաղի դեմ բոլոր տեսակի շրջափակումների և ուժի կիրառման այդ հարձակողական ձևերի վերացման ուղղությամբ»։ Սակայն 2002թ․Կոնգրեսն ուղղում կատարեց 907-րդ բաժնում, որով թույլատրվում է նախագահի կողմից ակտի կասեցումը և ռազմական աջակցությունն Ադրբեջանին, ինչն էլ ամեն տարի անում է ԱՄՆ նախագահը։