Լիբիայի վարչապետը հույս է հայտնել, որ արտասահմանյան ուժերն ու վարձկանները դուրս կբերվեն երկրից

Լիբիայի վարչապետ Աբդուլ Համիդ Դբեյբան հույս է հայտնել, որ բոլոր արտասահմանյան ռազմական ուժերն ու վարձկանները շուտով կհեռանան պատերազմից տուժած երկրից, հայտնում է Ahval-ը։

«Մի շարք երկրների հետ քննարկումներից հետո հուսադրող նշաններ կան, որ օտարերկրյա ուժերը կհեռանան Լիբիայից», - ասել է Լիբիայի վարչապետը։

Հայտնի է, որ երկրում մոտավորապես 20 հազար օտարերկրյա զորք և վարձկաններ կան, որոնք Լիբիայում են հայտնվել օգնելու Թուրքիայի աջակցությունը վայելող, միջազգային ճանաչում ստացած Ազգային համաձայնության կառավարությանն ու Ռուսաստանի, Եգիպտոսի և Արաբական Միացյալ Էմիրությունների աջակցությունը վայելող ապստամբ գեներալ Խալիֆա Հաֆթարի գլխավորած Լիբիայի ազգային բանակին։

2020 թվականի հոկտեմբերին լիբիական կողմերի միջև ստորագրվել է համաձայնագիր, որով նախատեսվում է ամբողջությամբ դադարեցնել մարտական գործողությունները, որոնք սկսվել են 2011 թվականին՝ ՆԱՏՕ-ի օգնությամբ իրականացված ապստամբության հետևանքով Մուամար ալ Քադաֆիի սպանությունից հետո։

Ինչպես ավելի վտեղեկացրել է Tert.am-ը, Լիբիայի ԱԳ նախարար Նաջլա ալ-Մանքուշը Թուրքիային կոչ էր արել, դեկտեմբերին կայանալիք նոր ընտրություններին ընդառաջ, դուրս բերել օտարերկրյա վարձկաններին երկրից։ Ի պատասխան Լիբիայի գլխավոր դիվանագետի հայտարարության՝ Թուրքիայի արտգործնախարար Մևլյութ Չավուշօղլուն ասել էր, որ Թուրքիայի ներկայությունը Լիբիայում նախորդ կառավարության հետ ձեռք բերված համաձայնության արդյունք է և հավելել, որ Թուրքիան միակ պետությունն է, որը երկրի արևելյան շրջաններից դեպի Տրիպոլի «Լիբիայի ազգային բանակի» հարձակումից հետո հանդես է եկել Լիբիայի պաշտպանությամբ։