Ցուցանիշները վկայում են, որ տնտեսական դինամիկան վերականգնման փուլում է. Նիկոլ Փաշինյան

Այս տարվա ապրիլի հարկային եկամուտները, ներառյալ դրոշմանիշային վճարումները, կազմել են շուրջ 180 միլիարդ դրամ: Այս մասին Կառավարության հերթական նիստին ասաց Նիկոլ Փաշինյանը:

Հայաստանում ապրիլին կատարված գործարքները 8,8 մլն հատով կամ 24 տոկոսով ավել են 2019-ի ապրիլի ցուցանիշներից: Ըստ Փաշինյանի՝ համեմատությունը 2019-ի հետ է, ոչ թե 2020-ի, որովհետև նախորդ տարի կորոնավիրուսի վարակով պայմանավորված ցուցանիշները նվազել էին:

Նա նշեց, որ 2021-ի ապրիլին դրամաշրջանառության ծավալները 130 մլրդ դրամով կամ 26,6 տոկոսով ավել են 2019-ի տվյալներից:

«Սա բավականին լավ և էական ցուցանիշ է: Կարծում եմ՝ այս ցուցանիշները վկայում են, որ տնտեսական դինամիկան վերականգնման փուլում է: Կարևոր եմ համարում, որ ԿԲ-ն հայտարարեց, որ տնտեսական գործերի ընթացքն ավելի լավ է, քան կանխատեսվում էր նախկինում: Մենք պետք է այս տեմպը ավելացնենք հնարավոր ամենալայն ծավալով»,-ասաց Փաշինյանը:

ՊԵԿ նախագահ Էդվարդ Հովհաննիսյանը նշեց, որ ապրիլի արդյունքներով հավաքագրված չորս ամիսների հարկային հավաքագրումները կազմում են 513 միլիարդ դրամ, որը նախորդ տարվանից ավելից է 12,3 միլիարդ դրամով, իսկ 2019 թվականից՝ 46,5 միլիարդ դրամով: Բիզնեսին վերադարձված փոխհատուցման ենթակա գումարները կազմել են 54 միլիարդ դրամ, որը ևս ավելի է նախորդ տարիների ցուցանիշներից:

«2021 թվականի 4 ամիսների տվյալներով կատարված գործարքների թիվը 2019-ի համեմատ ավել է 35,7 մլրդ հատով, իսկ դրամաշրջանառությունը վել է 372 մլրդ դրամով»,-ասաց նա:

«Սա մեկ ամսվա ընթացքում հարկային եկամուտների պատմական ռեկորդ է Հայաստանի համար: Ճիշտ է, այստեղ կա մի փոքր խորամանկություն այն առումով, որ անցյալ տարի, կապված կորոնավիրուսի համավարակի հետ, կարգավորումներով հնարավորություն տվեցինք շահութահարկի կանխավճարներ չվճարել, այս որոշումը նույնպես որոշակի ազդեցություն ունեցել է հավաքագրումների վրա, ինչը ոչ թե վատ է, այլ լավ․ արդարացվել է նախկինում կայացված մեր որոշումը: Դժվար ժամանակներում մենք հնարավորություն ենք տվել, որ այն գումարները, որոնք պետք է բիզնեսը վճարեր, մնա շրջանառության մեջ ու օգնի ճգնաժամի պայմաններում ավելի բարենպաստ վիճակում գտնվել»,-ասաց Փաշինյանը

Նիկոլ Փաշինյանը հայտնեց նաև, որ Հայաստանում պատմականորեն միշտ խնդրահարույց է եղել ավելացված հարկի վերադարձի պրոցեսը և հարյուր միլիարդավոր դրամների անհույս պարտքեր են եղել կուտակված: «Ապրիլի դրությամբ բիզնեսին հարկերի վերադարձման գծով ունենք պարտքերի պատմական մինիմում, այսինքն՝ ապրիլ ամսվա արդյունքներով պարտքը կազմել է 67,4 միլիարդ դրամ, ընդ որում մենք գերազանցել ենք մեր իսկ ռեկորդը»,-ասաց նա:

Նիկոլ Փաշինյանը ներկայացրեց 2021 թվականի ապրիլի դրամաշրջանառության ծավալները և հայտնեց, որ կատարված գործարքները 8,8 միլիոն հատով կամ 24 տոկոսով ավելի են 2019 թվականի ապրիլի համեմատ: «Այց ցուցանշները վկայում են, որ տնտեսական դինամիկան վերականգնման փուլում է, և այս տեմպը ոչ միայն պետք է պահենք, այլ ավելացնենք»,-ասաց նա: