Դեպք է եղել՝ կորոնավիրուսից մարդու վիճակը գնալով վատթարացել է, բայց բուժկենտրոնում մահճակալի ազատվելուն սպասելն օրեր է տևել, հոսպիտալացման կազմակերպումն անհարկի ձգձգվել է․ ՄԻՊ

2020-ը ՄԻՊ գրասենյակի համար եղել է աննախադեպ ծանրաբեռնված, 2020-ին միայն դիմումներն ու բողոքները և սեփական նախաձեռնությունները հասել են շուրջ 15,000-ի։ Այս մասին ԱԺ-ում 2020-ի հաղորդումը և խոշտանգումների կանխարգելման մեխանիզմի զեկույցը ներկայացնելիս հայտարարեց ՄԻՊ Արման Թաթոյանը։

Ներկայացնելով առողջապահական ոլորտում առկա խնդիրները՝ Թաթոյանը նշեց, թե անվճար բուժօգնության իրավունք ունեցող մարդիկ գերադասում են այն ստանալ վճարովի հիմունքներով, բողոքները վերաբերում են անվճար բուժօգնության որակին, պակաս է իրազեկվածության աստիճանը։

«Մարդիկ տեղեկացված չեն անվճար բուժօգնություն տրամադրելու դեպքերի, պետական պատվերի շրջանակներում բուժօգնության տեսակների, ինչպես նաև բնակչության՝ սոցիալապես անապահով ու հատուկ խմբերի ցանկի մասին, որոնք ունեն բուժօգնության արտոնություններ»,-ասաց ՄԻՊ-ը։

Նրա խոսքով՝ խնդիրների շարքից է նաև սոցիալապես անապահով ու առանձին խմբերում ընդգրկված քաղաքացիներին անվճար տրամադրվող դեղերի անարդյունավետությունը․ «Նրանք հաճախ հրաժարվում են դրանցից՝ նախընտրելով սեփական միջոցներով ձեռք բերել որակյալ դեղեր, պոլիկլինիկաներից չեն ստանում բժշկի նշանակած դեղամիջոցները, այլ հիմնականում դրանց համարժեք փոխարինողներն են ստանում»,-ասաց Թաթոյանը՝ նշելով, թե բազմաթիվ շահառուներ երբեմն հրաժարվում են ստանալ իրենց հասանելիք դեղերը նաև իրենց բուժող բժշկի ցուցումով․

«Բողոքները վկայում են, որ անվճար կամ մասնակի փոխհատուցմամբ տրամադրվող դեղը դրական ազդեցություն չի ունենում առողջության պահպանման, վերականգնման կամ բուժման համար, ինչի հետևանքով մարդիկ ստիպված են լինում գնել արդյունավետ դեղամիջոցը, որի պատճառով էլ չեն օգտվում դեղն ստանալու իրենց իրավունքից։ Քաղաքացիների զգալի մասը հրաժարվում է պոլիկլինիկական ծառայությունից օգտվելուց՝ պատճառաբանելով անվստահությունն ու բուժօգնության անարդյունավետությունը»,-ասաց Թաթոյանը։

Նա նշեց նաև, թե 2020-ին քիչ չեն եղել ահազանգերը կորոնավիրուսով վարակված անձանցից՝ հոսպիտալացումները պատշաճ չկազմակերպելու խնդիրների վերաբերյալ։

«Տիպային խնդիրներից է այն, որ կորոնավիրուսային վարակի պատճառով մարդու առողջական վիճակը գնալով վատթարանում է, օրեր շարունակ պոլիկլինիկայի բժիշկը հոսպիտալացման անհրաժեշտության մասին բարձրաձայնում է, սակայն, օրինակ, մինչև 3 օր հնարավոր չի եղել կապ հաստատել կորոնավիրուսային վարակով պացիենտների տեսակավորում իրականացնող մասնագիտական խմբի հետ, բժշկական կենտրոնում մահճակալի ազատվելուն սպասելն օրեր է տևել, հոսպիտալացման կազմակերպումն անհարկի ձգձգվել է»,-ասաց նա։

Օմբուդսմեն. Խոշտանգումները և դաժան դաժան վերաբերմունքը գերիների նկատմամբ Բաքվի պետական քաղաքականության դրսևորումն է. Ինչո՞ւ ոչ մի իրավապաշտպան կազմակերպություն չի այցելել և չի այցելում Ղարաբաղ