Հնդկաստանում կորոնավիրուսային վարակի տարածման 3-րդ ալիքն անխուսափելի է. վերջին 24 ժամում երկրում գրանցվել է վարակի ցուցանիշների նոր հակառեկորդ

Հնդկաստանի կառավարության գիտական հարցերով խորհրդատու Վիջայ Ռահղավանն ասել է, որ Հնդկաստանում կորոնավիրուսի տարածման երրորդ ալիքն անխուսափելի է, հայտնում է «ՌԻԱ նովոստի» լրտավական գործակալությունը։

«Երրորդ փուլն անխուսափելի է՝ հաշվի առնելով կորոնավիրուսային համաճարակի տարածման արագությունը, սակայն հստակ չէ, թե երրորդ փուլը երբ կսկսվի։ Մենք պետք է պատրաստ լինենք նոր ալիքների», - ասել է գիտական հարցերով խորհրդատուն և նախազգուշացրել, որ երկրում վարակի տարածումն արագացրած նոր շտամները հաղթահարելու համար պետք է «թարմացվեն» կորոնավիրուսի դեմ պատվաստանյութերը։

Վիջայ Ռահղավանն ասել է, որ պատվաստանյութերն արդյունավետ են կորոնավիրուսի առկա տարբերակների դեմ։

Վերջին 24 ժամվա ընթացքում Հնդկաստանը գրանցել է կորոնավիրուսային վարակի նոր հակառեկորդ։ Գրանցվել է կորոնավիրուսով վարակման 412,2 հազար նոր դեպք և մահվան ավելի քան 3,9 հազար դեպք։

Հնդկաստանն աշխարհում կորոնավիրուսային վարակի գրանցման դեպքերի թվով երկրորդ հորիզոնականում է՝ Միացյալ Նահանգներից հետո։ Առողջապահության նախարարության վերջին տվյալների համաձայն՝ Հնդկաստանում կորոնավիրուսով վարակված մարդկանց ընդհանուր թիվը գերազանցել է 21 միլիոնը: Ավելի քան 17,2 միլիոն մարդ ապաքինվել է, իսկ 230 հազար մարդ մահացել է կորոնավիրուսից: