Արդյո՞ք Վաղարշակ Հարությունյանը երաշխավորում է սահմանամերձ գյուղերի բնակիչների ֆիզիկական անձեռնմխելիությունը
Ինչպես ավելի վաղ հայտնի էր դարձել, ադրբեջանցի զինծառայողները հարձակվել են Հայաստանի Սյունիքի մարզի սահմանամերձ Արավուս գյուղի բնակչի վրա, ով Հայաստանի տարածքում անասուններ էր արածեցնում: Նրանք հարվածել էին նրան, ապա պահանջել հետ քշել անասուններին: Հայ զինվորներն օգնության էին հասել տղամարդուն: Տեսնելով, որ հայ զինվորականների մոտենում են, ադրբեջանցիները շտապ նահանջել էին:
Միջադեպը տեղի է ունեցել այն պատճառով, որ մեր հովիվը մոտեցել է դիրքերին ու այնտեղ քաշքշուկ է եղել, հետո այն հարթվել է: Այս մասին երեկ՝ մայիսի 5-ին, խորհրդարանում հայտարարել է ՊՆ նախարարի պաշտոնակատար Վաղարշակ Հարությունյանը՝ խոսելով վերը նշված միջադեպի մասին:
Հարությունյանը նաև վստահեցրել է, որ այն սահմանը, որը նախատեսված է եղել Խորհրդային Միությամբ ու ճանաչված անկախ Հայաստանով, ամբողջությամբ պահպանվում է. «Կան տեղեր, որոնք մերոնք 50 մետր առաջ են, կան տեղեր, որտեղ հակառակն է:
Դիրրքերն առաջ ու հետ են, քանի որ դրանք հնարավոր չէ դնել այնպիսի տեղ, որ ապահովի անվտանգությունն ու վերահսկողությունը: Սահմանային փոփոխությունները շատ փոքր են: Այդ հարցերը պետք է լուծվեն դեմարկացիայի ժամանակ»:
«Դեպքերը բացառելու համար պետք է համապատասխան մարմինները իրազեկման աշխատանքներ տանեն քաղաքացիների հետ, ասել՝ դիրքերին պետք չէ մոտենալ: Սա բնական շփման գծի կյանքն է: Կարևորը, որ չկան միջադեպեր, որոնք բերում են զոհերի ու վիրավորների»,-հավելեց նա:
Պատասխանելով հարցին, թե ի՞նչ են անում Հայաստանի իշխանություններն ու ՊՆ-ն տեղի բնակիչների հետ միջադեպերը կանխելու համար, Վ. Հարությունյանը տեսակետ է արտահայտել, որ շփման գծում կամ սահմանին միշտ կարող են նման կամ տարբեր տեսակի միջադեպեր լինել: Այնուամենայնիվ, ինչպես նշեց նախարարի պաշտոնակատարը, կարևորն այն է, որպեսզի այդ միջադեպերը մարդկանց մահվան կամ վիրավորման չհանգեցնեն: Հարությունյանը վստահ է, որ բնակիչներն ապահովագրված են նման դեպքերից: