Ավստրալիայում դատարանը ոտքը կորցրած ալեվարողին թույլ է տվել պահել իր վրա հարձակված շնաձկան ատամը

Ավստրալիայում ալեվարող Քրիս Բլոուզը 2015-ի ապրիլին շնաձկան կողմից հարձակման էր ենթարկվել և կորցրել ոտքը․ դեպքից միայն 6 տարի անց՝ օրեր առաջ, դատարանը նրան թույլ է տվել պահել իր վրա հարձակված շնաձկան ատամը, գրում է New York Post-ը։

Ինչպես մանրամասնում է թերթը, տեղական օրենսդրության համաձայն՝ պաշտպանության տակ գտնվող կենդանատեսակների մարմնի ցանկացած հատվածի վաճառքը կամ գնումը համարվում է անօրինական և նախատեսվում է մինչև 100 000 ԱՄՆ դոլարի չափով տուգանք կամ մինչև երկու տարի ժամկետով ազատազրկում։

«Ծիծաղելի է մտածել, որ օրենքի համաձայն՝ ինձ կարող էր չպատկանել այս ատամը՝ հաշվի առնելով, որ նա տարել է ոտքս»,- ասել է ալեվարողը։

Հիշելով դեպքի մասին՝ Բլոուզը պատմել է, որ գրեթե 5․5 մետրանոց շնաձկան հարձակումից հետո 10 օր կոմայի մեջ է եղել։ Նա նաև պատմել է, որ իրեն հիվանդանոց տեղափոխելուց հետո ոստիկանության աշխատակիցներն իր սերֆինգի տախտակից հայտնաբերել են շնաձկան ատամը և այն փոխանցել են համապատասխան մարմիններին։

«Այդ օրվանից ինձ թույլ չեն տվել տեսնել ատամը։ Ես չեմ շնաձկանը սպանել, նա ինքն է ոտքս տարել ու թողել ատամը, ուստի ինչո՞ւ այն չպետք է իմը լինի», - ասել է Բլոուզը։

Ինչպես հաղորդում է թերթը, միայն վերջերս դատարանն ի վերջո բավարարել է նրա պահանջը և նրան է վերադարձրել իր «հուշանվերը»։