Գերմանացի փաստաբանները դիմել են երկրի դատախազություն Լուկաշենկոյի «գործած հանցագործությունների» առնչությամբ
Չորս գերմանացի փաստաբաններ դիմել են Կառլսրուեի դաշնային դատախազություն՝ Բելառուսի բնակիչների նկատմամբ խաղաղ ցույցերի ֆոնին բռնության գործադրման առնչությամբ, որոնք սկսվել էին 2020 թվականի օգոստոսի երկրում նախագահական ընտրություններից հետո:
Այս մասին հայտնում է Deutsche Welle-ն՝ հղում կատարելով գերմանական DPA գործակալությանը:
Պաշտպանները, 10 բելառուսցիների անունից, դատախազություն դիմում են ներկայացրել մարդկության դեմ կատարված հանցագործությունների մասին: Փաստաբաններն ընդգծել են, որ Բելառուսում նախագահ Ալեքսանդր Լուկաշենկոյին և Բելառուսի իրավապահ մարմինների աշխատակիցներին ուժի և խոշտանգումների կիրառման համար իրավական հետևանքներ չեն սպառնում: Այս կապակցությամբ պաշտպանները Գերմանիային կոչ են արել անկախ հետաքննություն անցկացնել՝ վկայակոչելով այսպես կոչված համընդհանուր իրավասությունը, որը ենթադրում է քրեական հետապնդման հնարավորություն միջազգային իրավունքի կողմից արգելված և այլ պետություններում կատարված հանցագործությունների համար:
Ըստ փաստաբանների, որոնք իշխանությունների գործողությունները համարել են «դաժան», բելառուսները բողոքել են մարմնական խոշտանգումներից, սննդից և քնից զրկվելու, վիրավորանքներից և նվաստացումներից, որոնք լուրջ վնաս են հասցրել նրանց առողջությանը:
Ինչպես ավելի վաղ տեղեկացրել էր Tert.am-ը, Բելառուսում զանգվածային բողոքի ակցիաները սկսվել են ընտրությունների արդյունքների հրապարակումից հետո՝ 2020 թվականի օգոստոսի 9-ին: ԿԸՀ-ի հրապարակած տվյալների համաձայն՝ օգոստոսի 9-ին կայացած նախագահական ընտրություններում Բելառուսի նախագահի թեկնածու Տատյանա Տիխանովսկայան հավաքել է ձայների ընդամենը 10 տոկոսը, իսկ Ալեքսանդր Լուկաշենկոն հաղթող է ճանաչվել:
Ցույցերի ընթացքում ձերբակալվել և կալանավորվել է ավելի քան 30 000 մարդ, այդ թվում` տասնյակ լրագրողներ: Հարյուրավոր մարդիկ վիրավորվել են, ևս մի քանիսը զոհվել է: