Ոչ ոք չի մերժել գալ Ապրիլյան պատերազմի քննիչ հանձնաժողով՝ բացի Յուրի Խաչատուրովից․ նրա չգալը համարում եմ մեր աշխատանքի հիմնական բացթողում, այդ չգալու մեջ կար առեղծված․ Անդրանիկ Քոչարյան (տեսանյութ)

Ապրիլյան պատերազմի հանգամանքների ուսումնասիրման քննիչ հանձնաժողովի զեկույցը գտնվում է առաջին բաժնում, և գաղտնիության ռեժիմից օգտվելու իրավասություն ունեցող ցանկացած մեկը կարող է ծանոթանալ թե՛ զեկույցին, թե՛ զեկույցի հիմքում դրված բոլոր նյութերին, և ձայնագրություններին, որոնք իրենցից էական արժեք են ներկայացնում՝ սկսած այն ժամանակվա քաղաքական ղեկավարների ձայնագրություններից՝ նախագահ, վարչապետ, ԱՀ ՊԲ, ՀՀ ՊՆ զորքերի հրամանատարներ։

Այս մասին լրագրողների հետ ճեպազրույցում ասաց «Իմ քայլը» խմբակցության պատգամավոր, Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը՝ նշելով, թե ինքը կցանկանար, որ զեկույցը հրապարակվեր, քանի որ մեծածավալ աշխատանք է կատարվել։

«Երբ եղավ եզրակացություն, որ մենք գաղտնիության խնդիր ունենք, իմ ցանկությունները, բնականաբար, մղվեցին հետին պլան, մենք շարժվում ենք «Պետական գաղտնիքի մասին» օրենքի պահանջով։ Կարծում եմ՝ ժամանակի ընթացքում զեկույցի շատ դրվագներ, գաղտնիությունից դուրս գալով, հասանելի կդառնան հանրությանը։ Ի վերջո, այս զեկույցը, իմ կարծիքով, չպետք է մնա առաջին բաժնում, կան դրվագներ, որ համապատասխան մարմինները՝ Զինվորական դատախազությունը, Գլխավոր դատախազությունը, քննչական մարմինները, պետք է ուսումնասիրեն,-ասաց նա։

Հարցին՝ հանրությունն իր հարցերի պատասխանները որտեղից և ումից պետք է ստանա, Քոչարյանն արձագանքեց՝ կամաց-կամաց, թույլատրելիի սահմաններում կստանա իրենից, հանձնաժողովի մյուս անդամներից։ Նա նաև նշեց, թե շարունակում է մնալ այն կարծիքին, որ 44-օրյա պատերազմն Ապրիլյան քառօրյա պատերազմի շարունակությունն է։

Հարցին՝ արդյո՞ք հանձնաժողովը տվեց այն հարցերի պատասխանները, որ հանրությունը, իշխանություններն ունեին, Քոչարյանն արձագանքեց․

«Շատ հարցերի պատասխաններ մենք գտել ենք, փաստագրել ենք։ Զեկույցի արժեքը հենց այդ փաստագրման մեջ է։ Քննչական մարմինները դժվար թե կարողանային և ունենային այդպիսի իրավասություն, կամ շատ դժվար էր լինելու հանրապետության նախագահին, վարչապետներին կանչել, հարցեր տալ։ Այս հարցերի պատասխանները պետք է անպայման լսվեին քննիչ հանձնաժողովի իրավասության շրջանակում։ Դա ստացվեց։ Ոչ ոք չի մերժել գալ հանձնաժողով՝ բացի մեկ մարդուց, և արդեն մյուս մարմինները պետք է Խաչատուրովին կանչեն, հարցնեն։ Այդ մի հոգու չգալը ես համարում եմ մեր աշխատանքի հիմնական բացթողում։ Ես ամեն ինչ արեցի, որ ԳՇ նախկին պետը գար, ինքը չեկավ։ Այդ չգալու մեջ կար առեղծված։ Մենք շատ արդյունքներ ենք ունեցել, բայց պետք է Յուրի Խաչատուրովին լսեինք, որ ամբողջացնեինք այդ փազլը»,-նշեց նա։

Հարցին՝ Խաչատուրովի չգալով ինչ հարցի պատասխան չեն ստացել, Քոչարյանն արձագանքեց՝ թե այդ ժամանակ Խաչատուրովն ինչ է խոսել Մոսկվայում։

Դիտարկմանը, թե ՀՀ երրորդ նախագահ Սերժ Սարգսյանն է գնացել հանձնաժողով, Քոչարյանն արձագանքեց, թե նա ասել է՝ այդքան տեղյակ չէ։

Հարցին՝ ի վերջո, Ապրիլյան պատերազմում հաղթե՞լ ենք, թե՞ պարտվել, Քոչարյանն արձագանքեց․

«Սերժ Սարգսյանն ասում է՝ հաղթել է Իլհամ Ալիևին, բայց հաղթանակի արդյունքում ադրբեջանական կողմը ունի 1994-ի զինադադարի պայմանագրի խախտում, դեմարկացման գծի խախտում, և դա՝ հօգուտ Ադրբեջանի, հիմա մենք հաղթե՞լ ենք, թե՞ չէ։ Այն դիրքերում, որոնցում իրականացրել է գործողություններ, այդ դիրքերի առավելությունները պահել է»,-ասաց նա։

Քոչարյանը նաև համոզմունք հայտնեց, որ եթե լինի անհրաժեշտություն, իշխանությունը կուսումնասիրի նաև 44-օրյա պատերազմը։

Մանրամասները՝ տեսանյութում։