Մեխիկոյում մետրոյի փլուզված կամուրջն ընդամենը մեկ տարի առաջ էր ստուգվել
Մեխիկոյում մետրոյի փլուզված կամուրջն ընդամենը մեկ տարի առաջ էր ստուգվել, որեւէ խախտում չէր հայտնաբերվել:
Ինչպես հայտնում է «ՌԻԱ Նովոստին», Մեխիկոյի մետրոպոլիտենի 12-րդ գծի էստակադաները, որոնցից մեկը փլուզվել է նախորդ օրը անցնող գնացքի հետ միասին, 2016 թվականից սպասարկվում է ֆրանսիական TSO ընկերության կողմից: 2019 եւ 2020 թվականներին իրականացված ստուգումները շահագործման համար ռիսկեր չեն հայտնաբերել, հայտնել է Մեխիկոյի մետրոպոլիտենի ղեկավար Ֆլորենսիա Սերանիան:
Մեխիկոն միջազգային ընկերություն կներգրավի՝ երկաթուղու փլուզումը հետաքննելու համար:
Մետրոյի 12-րդ գիծը, որտեղ փլուզում է տեղի ունեցել, բացվել է 2012-ի հոկտեմբերին, դրա կառուցման մեջ 1,8 միլիարդ դոլար է ներդրվել: Մետրոյի այս գծից ամեն օր օգտվում է շուրջ 220 000 մարդ: Տեղի բնակիչների խոսքով՝ մետրոյի կամուրջը գրեթե բացման պահից հաճախ էր շարքից դուրս գալիս: 2014-ին այս գծի երթեւեկությունը դադարեցվել էր 20 կայարաններից 10-ում «ռելսերի վիբրացիայի» պատճառով, ինչի հետեւանքով գնացքը կարող էր դուրս գալ գծերից։
Մեխիկոյի հարավ-արեւելքում մետրոյի կամուրջը՝ անցնող գնացքի հետ միասին, մայիսի 3-ին, տեղական ժամանակով 22։22-ին փլուզվել է, զոհվել է 24 մարդ, 79-ը վիրավորվել եւ հոսպիտալացվել են: