Գյուղոլորտի խորհրդատուների կրճատումը գյուղատնտեսության նկատմամբ անլուրջ վերաբերմունքի շարունակությունն է. Լիլիա Ամիրխանյան
Գյուղատնտեսությունում առկա ակնհայտ երևացող խնդիրները հետևանքն են ոլորտի նկատմամբ եղած անլուրջ վերաբերմունքի։ Խնդիրներն արտացոլվում են գյուղմթերքի տարեկան արտադրության ծավալների կրճատմամբ: Այս մասին Tert.am-ի հետ զրույցում ասել է «Հայացք» վերլուծական կենտրոնի փորձագետ Լիլիա Ամիրխանյանը:
Ըստ նրա՝ դրանք երևում են գների բարձրացմամբ, ինչը միայն սոցիալական բնույթի հարց չէ: Գյուղմթերքի թանկացումը նաև հարված է հայկական արտադրանքի մրցակցային դիրքերին, ինչը առավել ևս վերջին շրջանում տեղի ունեցող տարածաշրջանային փոփոխությունների համատեքստում մեզ համար գերակա հարց է:
«Անշուշտ գյուղատնտեսական արտադրանքի գնագոյացման վրա բացասաբար են ազդում նաև գազի և հոսանքի սակագների թանկացումները, որոնց վեկտորները Կառավարությունն ուղղեց առավելապես հենց խոշոր սպառողների ուղղությամբ, այդ թվում՝ ջերմոցային տնտեսությունների: Այս քայլը, թեև այդ պահին շարքային սպառողների մոտ սոցիալական դժգոհության ալիքից որոշակիորեն թույլ տվեց խուսանավել, բայց հենց սպառողները դրա իրական հետևանքներից ոչ մի կերպ չեն խուսափում: Որպես առաջնային հետևանք՝ գնաճը»,- ասել է Լ. Ամիրխանյանը:
Փորձագետի կարծիքով, սակայն, գյուղոլորտի նկատմամբ պետական քաղաքականությունը ևս այսօր պատճառ է եղած խնդիրների, այդ թվում՝ գնաճի: «Գյուղատնտեսության նախարարությունը փակեցին, հավանաբար կարծելով, որ Էկոնոմիկայի նախարարությունը կարող է իրականացնել անհրաժեշտ գործառույթները: Այլևս ուշ է երկար խոսելու, թե որքան սխալ մոտեցում էր դա, հատկապես, երբ ոլորտը քեզ համար գերակա է: Բայց չենք կարող աչք փակել այն հետևանքների վրա, որոնք առաջացնում են խնդիրներ: Բերենք մասնավոր և ամենաթարմ օրինակը. ձվի գինը Զատկի տոնին ընդառաջ: Ուսումնասիրությունները ցույց տվեցին, որ թանկացման պատճառներից մեկն էլ նախորդ տարվա ընթացքում ձվի գերարտադրությունն էր: Դա շուկայում առաջացրել էր չարդարացված առաջարկ, որն էլ իր հերթին կարող էր դուրս մղել արտադրողներին շուկայից, կամ այս տարվա համար արտադրության ծավալները կրճատելու որոշման հանգեցնել: Միայն այս օրինակը ոլորտի վերահսկողության ու կառավարման ակնհայտ բացակայության խնդիր է, ինչը, չի բացառվում, որ այս մասշտաբի չլիներ, եթե ունենայինք նախարարություն: Եթե նախկինում նախարարությունը բավարար արդյունավետությամբ չի լուծել այսօրինակ խնդիրները, դա նշանակում է, որ պետք է արդյունավետություն բարձրացնել, ոչ թե ձերբազատվել նախարարությունից»,- նշել է Լ. Ամիրխանյանը:
Անդրադառնալով Էկոնոմիկայի նախարարության գյուղատնտեսության խորհրդատվության նորարարությունների և մոնիտորինգի վարչության մարզային բաժինների 69 հաստիքի կրճատման որոշմանը, փորձագետն ասել է. «Այս գործողությունը նույն անլուրջ վերաբերմունքի շարունակությունն է: Ինձ հետաքրքրում է՝ կարո՞ղ է գյուղատնտեսն առանց խորհրդատվության զբաղվել «սմարթ» գյուղատնտեսությամբ, թե՞ «խելացի գոմերի» կամ անգլերենի պարտադիր իմացությամբ մոշի արտադրության մասին նախորդ տարվա հայտարարությունները քարոզարշավի ընթացքում արված հենց այնպես հայտարարություններ էին»:
«Բացի այս ամենից, այսօր կա նաև կրճատվող անձնակազմի սոցիալական խնդիրը: Մենք այսօր գտնվում ենք ճգնաժամում: Եկամուտ ստացողի համար է դժվարացել կյանքը, ինչպե՞ս պետք է իրավիճակը հաղթահարի իր աշխատավարձից զրկվող անձը: Իսկ աշխատաշուկան աշխատատեղերի առաջարկով հագեցած չէ այնքան, որ հեշտ լինի նոր գործ գտնելը»,- ասել է փորձագետը: