Ինչի մասին են վկայելու նախընտրական ցուցակները և որքանով է իրավիճակի ողբերգական լինելը գիտակցվում մեր բնակչության մեծամասնության կողմից. «Առավոտ»
«Առավոտ» թերթը գրում է.
«Այժմ նախընտրական ցուցակներ կազմելու բուռն ժամանակաշրջան է: Մարդիկ, որոնք իրենց կյանքը չեն պատկերացնում առանց պատգամավորական մանդատի, բնականաբար, այսօր մեծ ջանքեր են գործադրում՝ հայտնվելու այն կուսակցությունների և դաշինքների ցուցակներում, որոնք կարող են մտնել Ազգային ժողով, և քանի որ տեղերը սահմանափակ են՝ պայքարը գնում է ցուցակի հնարավորինս բարձր տեղերում հայտնվելու համար:
Բնականաբար, դա չի վերաբերում այն կուսակցություններին, որոնք ի սկզբանե ոչ մի շանս չունեն խորհրդարանում հայտնվելու և հանդես են գալիս, այսպես ասած, «քարոզչական դուբլյորի» դերում: Այդպիսիք մասնակցում են ընտրարշավին ոչ թե սեփական ծրագրերով, այլ հիմնական թեկնածուների՝ Նիկոլ Փաշինյանի և Ռոբերտ Քոչարյանի հասցեին որևէ վատ բան ասելու նպատակով: Այս դեպքում ցուցակն այնքան էլ կարևոր չէ՝ կարևորը «պատրոնին» հաճոյանալն է՝ «կապիտուլյանտին» կամ «թալանչիներին» փնովելով: Բայց կան 4-5 կուսակցություններ, որոնք կանցնեն ապագա խորհրդարան:
Ընդ որում, կարծես թե, պարզ է, որ «Իմ քայլը», եթե անգամ մեծամասնություն ստանա, միևնույն է, այսօրվա չափով մանդատներ չի ունենա: Շատ կցանկանայի, որ այն պատգամավորները, որոնց ես համակրում եմ, չընդգրկվեն առաջիկա ընտրությունների իմքայլական ցուցակում՝ պարտված թիմի մաս կազմելը վարկաբեկիչ է: Բայց եթե մարդը ցանկանում է վարկաբեկվել հանուն մանդատի, դա, իհարկե, իր գործն է: Իհարկե, անիմաստ է սուրճի բաժակ նայելով, ենթադրություններ անել, թե ով որ ցուցակում է հայտնվելու: Բայց երբ դրանք կհրապարակվեն, հնարավոր կլինի որոշակի հետևություններ անել: Օրինակ, եթե Փաշինյանն իր ցուցակում ընդգրկի «յուրային» օլիգարխներին, ապա դա կխոսի այն մասին, որ «լավագույն ավանդույթները» շարունակվում են՝ փողատերերն արդեն պաշտոնապես աջակցում են իշխանության քաղաքական նպատակներին՝ ստանալով դրա դիմաց լայն «պրախոդ» բիզնեսում:
Կամ՝ օրինակ, եթե Նաիրա Զոհրաբյանը չլինի ԲՀԿ ցուցակում, դա, ըստ ամենայնի, կվկայի այդ կուսակցության և իշխանության միջև եղած որոշակի պայմանավորվածությունների մասին, ինչպես նաև կկանխորոշի, թե ինչպիսին կարող է լինել իշխանական կոալիցիան, եթե, իհարկե, այդպիսի անհրաժեշտություն առաջանա: Նման ձևով հնարավոր կլինի հետևություններ անել, որ եթե ՀՀԿ-ի ցուցակը չգլխավորի Սերժ Սարգսյանը՝ դա կխոսի այդ կուսակցության մտադրությունների լրջության աստիճանի մասին: Նաև հետաքրքիր կլինի այս կամ այն գործչի «անսպասելի» ի հայտ գալը որևէ անցողիկ ցուցակում: Դա հնարավորություն կտա գնահատելու տվյալ գործչի ոչ միայն ապագա, այլև նախորդ գործունեությունը: …Քաղաքական վերնախավը, մի խոսքով, ապրում է իր մանր կրքերով: Թե որքանով են այդ կրքերը կապված մեր տխուր իրականության հետ, հարց է: Որքանով է իրավիճակի ողբերգական լինելը գիտակցվում մեր բնակչության մեծամասնության կողմից՝ դա արդեն լուրջ խնդիր է»,-գրում է թերթը։
Նյութն ամբողջությամբ կարդացեք թերթի այսօրվա համարում։