Իշխանությունները փորձում են ամեն կերպ սահմանափակել իրենց ուղղված քննադատությունը․ Արմինե Օհանյանը՝ վիճակախաղերի գովազդը սահմանափակող օրենքի նախագծի մասին
Այս զարտուղի ճանապարհներով, նոր տարբերակներ մտածելով՝ փորձում են անպայման իրենց նպատակն իրագործել, որը թափանցիկ ցույց է տալիս, թե որն է այս Կառավարության նպատակը՝ ճնշել լրատվամիջոցներին: Այս մասին Tert.am-ի հետ զրույցում ասել է «Հրապարակ» օրաթերթի գլխավոր խմբագիր Արմինե Օհանյանը՝ անդրադառնալով վիճակախաղերի գովազդի մասին աղմկահարույց նախագծին:
«Մենք մեր նամակներում գրել էինք, որ հասկանում ենք օրենքի նախագծի տրամաբանությունը, այն է՝ ֆինանսապես մեզ խեղճացնել, մեր եկամուտները կրճատել, որ չկարողանանք գոյատևել, մենք գովազդների կրճատման պատճառով շատ լուրջ խնդիրներ ենք ունենալու. պարզ հաշվարկ է, որ եթե չեն կարողանում լռեցնել մեր քննադատությունները, ապա պետք է ֆինանսները ճնշելով նույնն անեն»,- ասաց նա և հավելեց, որ նախկինում առաջ բերված «Գովազդի մասին» ՀՀ օրենքը, որով գովազդներ էին սահմանափակվում, հիմա չի գործում, ուստի փորձում են այն փոփոխելով կյանքի կոչել:
Հիշեցնենք, որ ԱԺ-ն առաջին ընթերցմամբ ընդունել էր «Գովազդի մասին» ՀՀ օրենքում փոփոխություններ կատարելու մասին օրենքի նախագիծը, որով առաջարկվում է լրատվական կայքերում տեղադրված վիճակախաղերի, ինտերնետ շահումով խաղերի և խաղատների գովազդների ցուցադրման գրաֆիկը սահմանափակել, ըստ որի՝ դրանք կարող են հրապարակվել միայն երեկոյան ժամը 10-ից մինչև առավոտյան 7-ն ընկած ժամանակահատվածում։ Եթե այն 2-րդ ընթերցմամբ նույնպես ընդունվի, ապա ավելի քան 50 լրատվական կայք կզրկվի իր բյուջեի մոտ 70 տոկոսից:
Նշենք, որ այսօր օրենքի նախագծի հարցը քննարկվեց նաև Ազգային ժողովի Գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նիստում, իսկ ավելի վաղը խնդրի առիթով 3 լրատվամիջոցի ներկայացուցիչ նամակով դիմել էին հանձնաժողովի նախագահ Մխիթար Հայրապետյանին և Ֆինանսների նախարարությանը, սակայն այսօր ֆինանսների փոխնախարար Արմեն Հայրապետյանը հայտարարեց, թե լրատվամիջոցների դժգոհությունն այս օրենքի հետ կապ չունի:
Անդրադառնալով խնդրին՝ Արմինե Օհանյանը շեշտեց, որ վստահ է՝ երկրի այս վիճակում առաջնային խնդիրը վիճակախաղերի գովազդը և դրանից «բխող» խաղամոլությունը չէ: «Մենք նախկինում հազարավոր օրենքներ ենք ունեցել, որոնք թղթի վրա են մնացել, կյանքի չեն կոչվել, բայց այս օրենքի նախագծի հետևից գնում են, հետևողականորեն ուսումնասիրում են, թե ինչ փուլում է: Կա ազատ մամուլ, կա լուրջ քննադատություն ուղղված այս իշխանություններին և իրենք փորձում են ամեն կերպ քննադատությունները սահմանափակել, նվազեցնել»,– ասաց նա:
«Հրապարակ» թերթի խմբագիրը նշեց, որ այս օրենքով մի շարք կայքեր փակվելու են, կրճատումներ են լինելու աշխատակազմում և լրատվական կայքերի բնականոն աշխատանքը խաթարվելու: Ըստ նրա՝ այս իշխանությունները վերջապես գնան լրատվամիջոցների աշխատանքին խոչընդոտելու լավագույն ուղին: