G7 ԱԳ նախարարների հանդիպման թեմաները՝ մարդու իրավունքներ, տնտեսության վերականգնում եւ նոր սպառնալիքներին հակազդում
Մեծ յոթյակի (G7) խմբի արտաքին գործերի նախարարները Լոնդոնում մայիսի 3-5-ը՝ երկու տարվա ընթացքում առաջին դեմառդեմ հանդիպման ժամանակ, կքննարկեն նոր համաշխարհային սպառնալիքներին ուղղված հակազդման միջոցները, մարդու իրավունքների պաշտպանությունն ու տնտեսության վերականգնումը կորոնավիրուսի համավարակից հետո, գրում է ՏԱՍՍ-ը:
Ինչպես նշված է Միացյալ Թագավորության ԱԳՆ հայտարարության մեջ, բացի Մեծ Բրիտանիայի, Գերմանիայի, Իտալիայի, Կանադայի, ԱՄՆ-ի, Ֆրանսիայի եւ Ճապոնիայի ԱԳ նախարարներից հանդիպմանը հրավիրվել են ԵՄ արտաքին գործերի եւ անվտանգության քաղաքականության գերագույն ներկայացուցիչ Ժոզեփ Բորելը, Ավստրալիայի, Հնդկաստանի, Հարավային Կորեայի եւ ՀԱՀ-ի ներկայացուցիչն, ինչպես նաեւ Հարավ-Արեւելյան Ասիայի պետությունների ասոցիացիայի գլխավոր քարտուղար Լիմ Ջոք Հոյը:
«Հաջորդ շաբաթ կայանալիք G7-ի հանդիպումը կցուցադրի, թե ինչպես է «Գլոբալ Բրիտանիան» միավորում խոշորագույն համաշխարհային տնտեսությունները համատեղ մարտահրավերներին հակազդելու համար»,-հայտարարել է ԱԳՆ Դոմինիկ Ռաաբը: «Մենք կգործենք երաշխավորելու համար ամբողջ աշխարհում պատվաստանյութերի արդար հասանելիությունը, կորոշենք գլոբալ նպատակները աղջիկների կրթության ոլորտում, կհամաձայնեցնենք հավակնոտ գլոբալ գործողությունները կլիմայի պաշտպանության հարցում եւ կմշակենք նոր մեթոդներ սովին հակազդելու համար»,-հավելել է նախարարը:
Հաղորդվում է, որ պլենար նիստերից առաջ, որոնք նախատեսված են մայիսի 4-5-ին, երկուշաբթի Ռաաբը կանցկացնի երկկողմանի հանդիպում ԱՄՆ պետքարտուղար Էնթոնի Բլինքենի հետ: Կքննարկվեն առեւտրի մասին հարցերը, Չինաստանը, Աֆղանստանն ու Իրանը: Բացի այդ, Ռաաբը կանցկացնի երկու երկկողմանի հանդիպում: Ճապոնիայի ԱԳՆ Տոսիմիցու Մոթեգիի հետ կքննարկվի առեւտրային համագործակցությունը խորացնելու թեման եւ կհամաձայնեցվի Հնդ-խաղաղօվկիանոսյան տարածաշրջանում անվանգությանն ուղղված համատեղ մոտեցումը: Հնդկաստանի ԱԳՆ Սուբրամանիյան Ջայշանքարի հետ հանդիպման ժամանակ կքննարկվի օգնությունը, որը Լոնդոնը ցուցաբերում է Հնդկաստանին համավարակի նոր ալիքի դեմ պայքարում: