Մոսկվայի կողմից ԵՄ պաշտոնյաների նկատմամբ պատժամիջոցներ կիրառելու առնչությամբ ՌԴ դեսպանը կանչվել է Շվեդիայի ԱԳՆ
Ստոկհոլմում Ռուսաստանի դեսպանը կանչվել է Շվեդիայի արտաքին գործերի նախարարություն՝ Մոսկվայի կողմից Եվրամիության պաշտոնյաների նկատմամբ պատժամիջոցներ կիրառելու առնչությամբ:
Այս մասին հայտնում է Agence France-Presse-ը՝ վկայակոչելով ԱԳՆ խոսնակ Մաթս Սամուելսոնիի խոսքերը, գրում է «ՌԻԱ Նովոստի»-ն:
Գործակալության զրուցակցի խոսքով՝ դիվանագիտական առաքելության ղեկավարն իր բողոքն է հայտնել ռուսական միջոցառումների առնչությամբ: Ստոկհոլմն այն կարծիքին է, որ «ի տարբերություն ԵՄ պատժամիջոցների, Ռուսաստանի պատժամիջոցներն արդարացված չեն, իրավաբանորեն անհասկանալի են և արտահայտում են քաղաքական դրդապատճառներ»:
Հիշեցնենք՝ ՌԴ ԱԳՆ նախօրեին հրապարակել էր ԵՄ երկրների 8 քաղաքացիների անուններ, որոնց մուտքն արգելված է Ռուսաստան: Սև ցուցակում ընդգրկված են Եվրախորհրդարանի նախագահ Դեվիդ Մարիա Սասոլիի, Եվրոպական արժեքների և թափանցիկության հանձնաժողովի փոխնախագահ Վերա Յուրովայի և ԵԽԽՎ-ում ֆրանսիական պատվիրակության անդամ Ժակ Մերի անունները:
Նշվում է՝ Մոսկվան նման որոշում է կայացրել՝ պատասխանելով մարտի 2-ին և 22-ին վեց ռուսաստանցիների նկատմամբ սահմանված ԵՄ պատժամիջոցներին:
Ինչպես ավելի վաղ տեղեկացրել էր Tert.am-ը, Եվրամիությունը պատժամիջոցներ էր սահմանել ռուսաստանցի պաշտոնյաների նկատմամբ՝ կապված ռուս ընդդիմադիր գործիչ Ալեքսեյ Նավալնիի շուրջ ստեղծված իրավիճակի հետ:
Պատժամիջոցների ցուցակում ընդգրկվել են Ռուսաստանի գլխավոր դատախազ Իգոր Կրասնովը, ՌԴ քննչական կոմիտեի նախագահ Ալեքսանդր Բաստրիկինը, «Ռոսգվարդիա»-ի տնօրեն Վիկտոր Զոլոտովը, ՌԴ պատիժների իրականացման դաշնային ծառայության տնօրեն Ալեքսանդր Կալաշնիկովը: