Ադրբեջանի ներկա սանձարձակ պահվածքը հետևանք է նաև ԵՄ ուշացած և ոչ լիարժեք արձագանքների. Նաիրա Կարապետյան

Եվրոպական միությունը վերջերս երկու անգամ անդրադարձավ Արցախում հետպատերազմական զարգացումներին, նախ` հայտարարությամբ կոչ արեց վերադարձնել ռազմագերիներին ու ձերբակալված անձանց՝ անկախ նրանց կալանավորման հանգամանքներից, ապա ԵՄ արտաքին գործերի և անվտանգության քաղաքականության գլխավոր խոսնակ Պիտեր Ստանոն հայտարարեց, որ «Ռազմական ավարի պուրակը» նողկալի են, անհամատեղելի հաշտեցման հետ և խոչընդոտում են ապագա համագործակցությանը: Այս մասին մեզ հետ զրույցում նշել է «Եվրոպական ինտեգրացիա» ՀԿ նախագահ Նաիրա Կարապետյանը:

«Իհարկե, ողջունելի է ԵՄ այս հայտարարությունները, սակայն պետք է փաստել, որ Ադրբեջանի ներկա սանձարձակ պահվածքը հետևանք է նաև Եվրոպական միության ուշացած և ոչ լիարժեք արձագանքների»,- ասել է նա:

Ըստ նրա, 44-օրյա պատերազմի ողջ ընթացքում Ադրբեջանը չստացավ այն ուղերձները, որոնք խստագույն կդատապարտեին նրա կողմից ռազմական հանցագործությունները` ուժի կիրառումը, աննախադեպ լայնածավալ ագրեսիան, արգելված զինատեսակների կիրառումը, Թուրքիայի անթաքույց աջակցությունն Ադրբեջանին ու անմիջական մասնակցությունը պատերազմին, օտարերկրյա վարձկանների առկայությունը և միջազգային մարդասիրական իրավունքի կոպիտ խախտումները` քաղաքացիական բնակչության ռմբակոծումը, ֆոսֆորային ռումբերը, մշակութային ժառանգության ոչնչացումը և այլն:

«Ադրբեջանը տպավորություն ունի, որ իրեն հաջողվեց պատերազմի միջոցով լուծել հակամարտությունը, և եթե չկա կոշտ գնահատական և միջազգային իրավական գործընթացներ` ռազմական հանցագործությունների վերաբերյալ, ուրեմն իր պահվածքը տրամաբանված է», - հավելել է Նաիրա կարապետյանը:

Նրա կարծիքով, նույն «Ռազմական ավարի պուրակի» բացման կապակցությամբ միջազգային հանրությունը պետք է նախաձեռնի անհանդուրժողականության և հայատյացության բացահայտ տարածման դեմ արշավ:

«Մեր բոլոր ջանքերը պետք է ուղղված լինեն միջազգային հանրության աչքերում Ադրբեջանի իրական կերպարը բացահայտելու գործին», - եզրափակել է Նաիրա Կարապետյանը;