Ես փնտրում եմ այդպիսի մեղադրողի, որ մի օր դեմս կանգնի․ Արթուր Դավթյանը՝ դիտարկմանը, թե իրեն մեղադրում են «Մարտի 1»-ի գործը տապալելու մեջ (տեսանյութ)

Գլխավոր դատախազն այդ հարցին ունի հետևյալ պատասխանը՝ բացահայտվածության հատվածով գործը գնացել է դատարան, մնացած մասով մենք ունենք անջատված մաս, որը մինչդատական վարույթում է, քրեադատավարական առումով բացահայտված քրեական գործը մինչդատական վարույթում չի մնում։ Այս մասին ԱԺ-ում լրագրողների հետ ճեպազրույցում ասել է ՀՀ գլխավոր դատախազ Արթուր դավթյանը՝ անդրադառնալով դիտարկմանը, թե Նիկոլ Փաշինյանն ասում էր՝ «Մարտի 1-ի» գործը, ըստ էության, բացահայտված է, և հարցին՝ իր կարծիքով՝ բացահայտվա՞ծ է։

«Ինձ վարչապետի խոսքը մեկնաբանելու հարցադրումներ մի արեք, հարցրեք վարչապետին, կարծեմ՝ ինքն էլ դրանով մեկնաբանություններ տվել է։ Ես գլխավոր դատախազ եմ»,-նշեց նա։

Դիտարկմանը, թե իրեն մեղադրում են գործը տապալելու, քննությունը ձախողելու մեջ, Դավթյանն արձագանքեց․ «Ես փնտրում եմ այդպիսի մեղադրողի, որ մի օր դեմս կանգնի»։

Այն դիտարկմանն էլ, թե այդ գործը դատարանում փշրվել է, Դավթյանն արձագանքեց, որ իրավական այդպիսի տերմինոլոգիա չկա։

«Ունենք ՍԴ որոշում, ունենք դրա արդյունքում առաջին ատյանի դատարանի կողմից կայացրած դատական ակտ, այն մեր կողմից վիճարկվել է Վերաքննիչ դատարանում՝ համապատասխան հիմնավորումներով, որոնց մասին մենք բազմիցս հրապարակային խոսել ենք, և այդ գործի՝ մեր պատկերացրած իրավական հեռանկարի հարցով մենք նաև նախաձեռնել են դիմում ՍԴ։ Մեր պատկերացրած հեռանկարը հետևյալն է՝ եթե մեզ հաջողվում է հասնել մեր դիմումի բավարարմանը ՍԴ-ում, մենք հնարավորություն ենք ստանում այդ գործով ամբաստանյալների արարքները վերաորակելու, և, ըստ էության, գործի քննությունը շարունակելու, ապացույցները հետազոտելու»,-ասաց նա։

Անդրադառնալով ՍԴ-ի կողմից դիմումը չբավարարելու հնարավոր որոշմանը՝ գլխավոր դատախազն ասաց․ «Եթե ՍԴ-ն գտնում է, որ վերաորակման հնարավորություններ չի տալու, նշանակում է՝ մենք իմ ասած իրավական ճանապարհով չենք կարողանալու գնալ»,-ասաց նա։

Նա ընդգծեց՝ այդ քրեական գործով անջատված մաս կա, որն իր մեջ ներառում է ոչ միայն անձանց սպանությունների վերաբերյալ հատվածներ, այլև այդ գործընթացին առնչված բազում այլ հանցավոր դրսևորումներ։

«Նոր հանգամանքներ չենք փորձում ի հայտ բերել։ Այդ գործով նախաքննության առարկա են բազմաթիվ հանցավոր դրսևորումներ, այդ թվում՝ 10 անձանց սպանությունները։ Եթե վաղը պարզվի՝ այդ անձանցից որևէ մեկը 10 անձանցից որևէ մեկի սպանությունն է կատարել, պարզ չէ՞, որ այդ անձի նկատմամբ դրա համար հետապնդում է իրականացվելու։ Մենք պահանջում ենք, որ քննվի, այսօր էլ ենք պահանջում, ու վաղն էլ ենք պահանջելու, ու դատախազական ներգործության բոլոր միջոցները կիրառվելու են, որ բացահայտումներ ունենք»,-ասաց նա։