«Այս ամենը կապ ունի ամսի 21-ի ցույցերի հետ». ինչու է ՊԵԿ-ը կասեցրել Ագարակի տերմինալի աշխատանքը
Ագարակի մաքսային պահեստի լիցենզիայի ժամանակավոր դադարեցման պատճառը ուղեբեռների ռենտգեն սարքավորման անջատված լինելն է եղել: Այս մասին NEWS.am-ի հետ զրույցում երեկ երեկոյան նշել է «ՎԻԼԱ ՏՐԱՆՍ» մաքսային միջնորդական ընկերության տնօրեն Արման Մաթևոսյանը:
«ՊԵԿ նախագահի մաքսային գծով տեղակալ Շուշանիկ Ներսիսյանն հինգ րոպե մաքսային պահեստում գտնվելուց հետո խախտում է արձանագրել, որ տվյալ պահին նկարող ռեմտգեն սարքավորումն ուղղակի անջատված է եղել, սակայն իրենք ասում են՝ խափանված է։ Շուշանիկ Ներսիսյանը հարցրել է սարքը սարքին է, ասել են, որ անջատված է, հինգ րոպե շրջայց է կատարել, այնուհետեւ մեզ բանավոր տեղյակ են պահել , որ դեպի տերմինալ տարածման հայտարարագրեր չեն տրվելու, քանի որ փակում են տերմինալը։ Այն խափանված չէ, սարքին վիճակում է, մենք էլ համապատասխան մարմիններին գրությամբ դիմել ենք, որ սարքավորումները գան, միացնեն։ Սարքի անջատված լինելը հիմք ընդունելով որոշել են դադարեցնել տերմինալի աշխատանքը»,- ասաց նա:
Արման Մաթեւոսյանի խոսքով՝ Սիսիանի մաքսատանն այդ սարքավորումից չկա, սակայն դրա պատճառով մաքսատան աշխատանքը չի դադարեցվում։
«Մենք սարքը շատ քիչ ենք օգտագործում, քանի որ մեզ մոտ եկած բեռների 99 %-ը չափսերով շատ մեծ են եւ չեն տեղավորում սարքավորման մեջ։ Մեծ մասը լինում է երկաթ, շինարարության մեջ օգտագործվող բեռներ։ Սարքավորումն այդտեղ դրված է, բայց մենք չենք օգտագործում։ Ագարակ տերմինալում ոչ մի տնտեսվարող երբեք բողոք չի ներկայացրել որ իր ուղեբեռն այդ սարքավորումից չի օգտվել քանի որ մեր բեռների 99 մեծ չափսերի են քանի որ կարիք չկա սարքավորումն օգտագործելու»,-ասաց նա՝ հավելելով, որ այս ստուգումն անակնկալ է եղել:
Արման Մաթեւոսյանը համոզմունք հայտնեց, որ այս ամենը քաղաքական դրդապատճառներ ունի եւ քաղաքականացված է:
Նրա խոսքով, այս պահին բեռնավորված մոտ 80 մեքենա սպասում է Մեղրիի մաքսային կետում. «Մոտակա մաքսային պահեստը Մեղրիից գտնվում է 80 կմ հեռավորության վրա՝ Կապան քաղաքում։ Այնտեղ բեռ տեղափոխելն արդեն գումարների հետ է կապված։ Մենք ունենք կնքված պայմանագրեր տրանսպորտային ընկերությունների հետ, որոնց գումարը վճարվել է մինչեւ Մեղրի տեղափոխման համար»: Հիմա բոլոր վարորդները սպասում են, տեսնեն ինչ հանգուցալուծում կստանա հարցը: Հիմա եթե Ագարակի տերմինալը չկարողանանք օգտագործել, ամեն մեքենայի համար մեծ գումարներ պետք է վճարվեն եւ տրանսպորտային ընկերությունների համար դա ձեռնտու չէ:
Նույն խնդրի առնչությամբ «Ագարակ տերմինալ» ՍՊԸ-ի փոխտնօրեն Էմիլ Մկրտչյանը մեզ հետ զրույցում նշեց, որ սարքը, որ անջատած է եղել, միացնելու համար պետք էին մասնագետներ, որոնք պետք է գային Երեւանից, բայց մինչ այդ եկել է Շուշանիկ Ներսիսյանը։ «Դրանից հետո ամսի 19-ին խումբ է եկել տեսնելու համար թե ինչ թերություններ կան, ամեն ինչ նորմալ է եղել։ Բուն պատճառն ասում են, որ ռենգեն ապարատի չաշխատելն է: Բայց այսպիսի մի բան, խումբը եկել է ամսի 19-ին արձանագրել են, որ ռենգեն ապարատը չի աշխատում, նորմալ աշխատանքային գործընթացի դեպքում հենց հաջորդ օրը պետք է դադարեցնեին տերմինալի գործունեությունը,: Բայց տերմինալը փակվել է ամսի 22-ին բանավոր կերպով: Եթե մենք նորմալ պետություն ենք, ունենք նորմալ ՊԵԿ, պետք է ամսի 20-ին գրությամբ պետք է դադարեցնեին, բայց գրությունը եկել է ամսի 26-ին։ Այս ամենը կապ ունի ամսի 21-ի ցույցերի հետ»: