Պնդել, թե սյունեցիների ըմբոստությունը որևէ մեկի կողմից հրահրված է, նշանակում է չճանաչել սյունեցուն. նրանց ինչ-որ բան հրահրել հնարավոր չէ. Սամվել Սողոմոնյան
Հայաստանի վերջին հարյուրամյակում մեկ անգամ արդեն ՀՀ փրկության ուղու սկիզբը Սյունիքով է դրվել, որը բերել է Հանրապետության փրկության: Համոզում ունեմ, որ ՀՀ երրորդ Հանրապետութւան փրկության ճանապարհի սկիզբը նույնպես Սյունիքից կսկսվի, սյունեցու մեղրեցու տեսակը չի հանդուժի ան, ինչ տեղի է ունենում Հանրապետության ներսում: Երեկ երեկոյան ի աջակցություն Սյունիքում ձերբակալվածների կայացած հանրահավաքի ժամանակ ասաց բժիշկ- վիրաբույժ, «Առողջապահական իրավունքի միջազգային կենտրոն»-ի ղեկավար Սամվել Սողոմոնյանը:
«Պնդել, թե սյունեցիների և մեղրեցիների ըմբոստությունը որևէ մեկի կողմից կազմակերպված կամ հրահրված է, պարզապես նշանակում է չճանաչել մեղրեցուն և սյունեցուն: Խորհուրդ կտամ այն մարդկանց, որոնք նման անհեթեթ պնդումներ են անում, պարզապես գնան և ապրեն Մեղրիում, նրանց հետ հաց կիսեն, և իրենց համար պարզ կլինի, որ նրանց արագ հրահրել ինչ-որ բան անելու նպատակով հնարավոր չէ, սյունեցիները շատ ինքնաբավ, սեփական կարծիք ու դիրքորոշում ունեցող մարդիկ են: Ճանաչելով իրենց կասեմ՝ շատ վատ վերջաբան է ունենալու այն իշխանությունը, որը սյունեցու համբերության բաժակը լցրել է, սյունեցին՝ խաղաղությամբ լինի, արյունով, զենքով, թե երգուպարով, ինքն իր հայրենիքը փրկելու և իր հայրենիքի ազատագրմանը հասնելու է, սա ասում եմ շատ պատասխանատու կերպով՝ որպես մարդ, որը 9 տարի ապրել է իրենց հետ»,- ընդգծեց նա:
Անդրադառնալով Մեղրիի համայնքապետ Մխիթար Զաքարյանի ձերբակալությանը՝ Սողոմոնյանն ասաց, որ նայելով տեսանյութը, որտեղ Մխիթար Զաքարյանը ներկա է բողոքի ակցիային, մեկ դրվագում է նկատել, որ ձեռքերը վեր պարզած փորձել էր հանդարտեցնել մեղրեցիներին, որ ավելորդ սադրանքներ չլինեն:
«Ես քաղաքական հետապնդում և վենդետա եմ համարում այն, ինչ ներկայումս կատարվում է Սյունիքի համայնքապետերի հետ: Անթույլատրելի եմ համարում, որ բռնի ուժ են կիրառում բերման ենթարկելիս, նույնիսկ՝ երեք ազատամարտի մասնակցի նկատմամբ, որն իր տունը այրեց, որպեսզի թուրքի բաժին չդառնա: Անթույլատրելի է այն, ինչ ներկայումս ուժային կառույցները ղեկավարների հրահրմամբ իրականացնում են ՀՀ քաղաքացու նկատմամբ: Կարծում եմ, որ գալու է այն օրը, և այն հեռու չէ, որ բոլորը պատասխանատվության են ենթարկվելու իրենց վարքագծի համար: Զարմանում եմ՝ ինչպե՞ս կարող են կալանքի տալ մի մարդու՝ Մխիթար Զաքարյանին, որը երեք անչափահաս երեխա ունի: Սա հերթական բեմադրված շոուներից է, փորձում են մարդկանց պասիվ պահել քաղաքական գործընթացներում»,- նշել է Սողոմոնյանը: