Սյունեցիներին ձերբակալելով՝ Նիկոլ Փաշինյանի կողմից իրականացվել է պաշտոնական դիրքի չարաշահում. Վարդան Այվազյան (տեսանյութ)
Սյունիքի հարգանք ու սեր վայելող համայնքի ղեկավարները այսօր բերման են ենթարկվել և ձերբակալվել են անմիջականորեն մեր վարչապետի հրահանգով, և ակնհայտ է, որ Նիկոլ Փաշինյանի կողմից իրականացվել է պաշտոնական դիրքի չարաշահում: Այս մասին Քննչական կոմիտեի դիմաց լրագրողների հետ զրույցում ասաց սահմանադրագետ Վարդան Այվազյանը:
«Փաշինյանը իր լիազորությունների սահմանազանցում է և այս կապակցությամբ իրավապահ մարմինների ուշադրությունն ենք հրավիրում այս հանգամանքի վրա և հորդորում ենք այս փաստի առթիվ հարուցել քրեական գործ և կատարել համապատասխան քննություն»,- ասաց Այվազյանը:
Սահմանադրագետը ընդգծեց՝ համայնքի ղեկավարների գործողությունները եղել են օրենքի տարրին համապատասխան: Ըստ նրա՝ սա քաղաքական հետապնդում է:
«Համայնքի ղեկավարների վարքագիծը եղել է լիովին իրավաչափ, Սահմանադրության և գործող օրենքների շրջանակներում, և բնականաբար բոլորիս համար էլ ակնհայտ է՝ սա հերթական քաղաքական հետապնդումն է: Միանշանակ դա ինքնաբուխ ակցիա էր, անգամ հայհոյախառն արտահայտությունները, որոնք հնչում էին վարչապետի հասցեին, չեմ կարծում, որ լիներ կազմակերպված ինչ-որ գործընթաց»,- նշեց սահմանադրագետը:
Այվազյանը նաև անդրադարձավ նրան, որ երեկ Նիկոլ Փաշինյանին ուղեկցել են այլ երկրի դրոշով մեքենաներ և սա նրա կողմից եղել է դավաճանություն ի ցույց աշխարհի: «Եթե Նիկոլ Փաշինյանին ուղեկցում են այլ երկրի դրոշով մեքենաներ, ապա գործ ունենք մեր երկրի ինքնիշխանության լիակատար հուղարկավորության հետ, այսինքն՝ վարչապետը դրանով համայն աշխարհին ցույց տվեց, որ ինքը հուղարկավորել է մեր երկրի ինքնիշխանությունը, դա հայրենիքի դավաճանության հանցագործության ժանրից է»,- ասաց Այվազյանը: