Հայտնի է, թե ինչ քրեական գործով է Մեղրիի քաղաքապետը Քննչական կոմիտեում
Մեղրիի քաղաքապետ Մխիթար Զաքարյանը հրավիրվել է ՀՀ քննչական կոմիտե՝ խուլիգանության եւ իշխանության ներկայացուցչի նկատմամբ բռնություն կիրառելու հատկանիշներով հարուցված քրեական գործի շրջանակներում։ Այս մասին տեղեկացնում են Քննչական կոմիտեից։
Քննչական կոմիտեից տեղեկացանք, որ Զաքարյանի վերաբերյալ քրեական գործ է հարուցվել ՀՀ ՔՕ 258 հոդվածի 1-ին եւ 3-րդ մասերի եւ 316 հոդվածի 1-ին մասի հատկանիշներով:
Հայտնեցին, որ հարուցված քրեական գործն ընդունվել է Քննչական կոմիտե եւ գտնվում է ՀԿԳ վարչության վարույթում:
Նշենք, որ Սյունիքի մարզում երեկ՝ ապրիլի 21-ին, տեղի ունեցած դեպքերի առնչությամբ հարուցվել է քրեական գործ՝ ՀՀ ՔՕ 258-րդ հոդվածի 3-րդ մասի 1-ին եւ 2-րդ կետերով (խուլիգանության), 316-րդ հոդվածի 1-ին մասի (իշխանության ներկայացուցչի նկատմամբ բռնություն գործադրելը) հատկանիշներով։ Այս մասին Սյունիքի մարզպետարանում տեղի ունեցած խորհրդակցության ժամանակ վարչապետ Նիկոլ Փաշինյանին զեկուցել էր դատախազ Էդուարդ Հարությունյանը։
Հիշեցնենք, որ խիստ գաղտնի պայմաններում Սյունիքի մարզ մեկնած Նիկոլ Փաշինյանին երեկ մարզի տարբեր քաղաքներում բնակիչները դիմավորել էին հայհոյանքներով եւ վիրավորանքերով։ Սյունեցիները պահանջել են՝ հեռանալ մարզից։
Քաջարանցիները փակել էին քաղաք մտնող ճանապարհը, այդպիսով Փաշինյանն ընդհանրապես չէր կարողացել Քաջարան մտնել։
Նշենք, որ Փաշինյանի հետ մարզ են գնացել մեծ թվով ոստիկաններ, ԱԱԾ-ի «Ալֆա» ջոկատը եւ անվտանգության մեծ թվով աշխատակիցներ։
Նշենք, որ Փաշինյանը փողոցներով քայլում է մեծ թվով անվտանգության աշխատակիցների ուղեկցությամբ։
Ինչպես քիչ առաջ Operativ-ը հայտնեց, այսօր փաստաբանն ավելի վաղ իր ֆեյսբուքյան էջում գրել էր, որ Մեղրիի քաղաքապետին հրավիրել էին Ոստիկանության բաժին, սակայն ավելի ուշ Մեղրիի ոստիկանությունից տեղափոխել են Երևան:
Այնուհետև տեղեկացրինք նաև, որ Մեղրիի քաղաքապետը Քննչական կոմիտեում է:
Հրապարակել էինք նաև փաստաբանի տեսանյութը՝ քննչական կոմիտեից:
Հիշեցնենք՝ Նիկոլ Փաշինյանի՝ Սյունիքի մարզ այցի ժամանակ սյունեցիները թույլ չեն տվել նրան մտնել համայնքներ: Բողոքի ակցիա է իրականացվել Սյունիքի տարբեր համայնքներում, որտեղ քաղաքացիները վանկարկել են «Նիկո՛լ, դավաճա՛ն, թո՛ւրք, հողատո՛ւ», հնչել են նաև տարբեր հայհոյանքներ և վիրավորանքներ, որոնց ներքո նա լքել է քաղաքները:
Փաշինյանը թիկնազորի ուղեկցությամբ մտել է Սյունիքի մարզպետարան և խորհրդակցություն անցկացրել, որի ընթացքում, մասնավորապես, նշել է. «Ես ուզում եմ անդրադառնալ այսօր Մեղրիում տեղի ունեցած միջադեպին․ հստակ է, որ տեղի է ունեցել օրենքի խախտում և ես ակնկալում եմ, որ հանրապետության իրավապահ մարմինները շատ հստակ և կոշտ կերպով կարձագանքեն իրավիճակին»:
Հրապարակել էինք նաև փաստաբանի տեսանյութը՝ քննչական կոմիտեից: