ԱՄՆ-ի եւ Իսրայելի միջեւ լարվածությունն աճում է Իրանի հետ բանակցությունների առաջընթացին զուգահեռ
Քանի որ Վիեննայում միջուկային բանակցությունները կրիտիկական փուլ են մտնում, Իսրայելի կառավարության եւ Ջո Բայդենի վարչակազմի միջեւ Իրանի շուրջ տարաձայնություններն ու կասկածներն աճում են, գրում է Axios-ը:
Երկու կողմերն էլ ցանկանում են խուսափել հանրային պայքարից, որն առաջացել է 2015 թվականի գործարքի շուրջ բանակցությունների ընթացքում: Մասնավորապես, երկու կողմերից հիասթափությունն աճում է վստահության, համակարգման եւ թափանցիկության բացակայության պատճառով:
Միջուկային ծրագրի շուրջ բանակցությունների առաջին եւ երկրորդ փուլերի միջեւ, որոնք, ինչպես հուսով է ԱՄՆ-ը, կհանգեցնեն գործարքի վերսկսմանը, իսկ Իսրայելը հույսը դնում է ձախողման վրա, իսրայելական ակնհայտ սաբոտաժը հանգեցրեց պայթյունի Իրանի Նաթանզի միջուկային կայանում:
Երկու օր անց ԱՄՆ-ի եւ Իսրայելի բարձրաստիճան պաշտոնյաները հանդիպել են Իրանի շուրջ ռազմավարական բանակցությունների երկրորդ փուլում:
Բանակցություններին մասնակցած իսրայելական երկու պաշտոնատար անձանց խոսքերով՝ ազգային անվտանգության հարցերով խորհրդական Մեյր Բեն Շաբբաթը մտահոգություն է հայտնել, որ ԱՄՆ-ը բավականաչափ ուշադրություն չի դարձրել Իսրայելի կառավարության դիրքերին Իրանի հետ դիվանագիտության ընթացքում: Նրանք ասել են, թե ամերիկյան կողմը մտահոգություն է հայտնել, որ Իսրայելը ռազմական ու հետախուզական գործողություններ է իրականացնում Իրանի դեմ՝ առանց այդ մասին Վաշինգտոնին տեղեկացնելու: Իսրայելցիները ընդգծել են Իրանից Իսրայելը պաշտպանելու իրենց իրավունքն ու պարտականությունը: Իսրայելցի պաշտոնյաները հայտնել են, որ նախօրոք տեղեկացրել են Միացյալ Նահանգներին վերջին գործողությունների մասին: «Դա ամերիկացիների համար անակնկալ չէր»,- ասել է իսրայելցի մի պաշտոնյա:
Իսրայելցիները պնդում են, որ Բայդենի վարչակազմը լիովին թափանցիկ չի եղել իրենց հետ՝ կապված այն առաջարկների հետ, որոնք անում է Վիեննայում:
Բայդենի վարչակազմի բարձրաստիճան պաշտոնյան մերժել է այս մեղադրանքները` շեշտելով, որ ԱՄՆ-ի եւ Իսրայելի պաշտոնյաները մշտապես սերտ խորհրդակցություններ են անցկացնում: «ԱՄՆ-ը եւ Իսրայելը ապագայում կպահպանեն այս սերտ եւ անկեղծ երկխոսությունը»,- ասել է ամերիկացի պաշտոնյան:
Իսրայելի ազգային անվտանգության բարձրաստիճան պաշտոնյաները հաջորդ շաբաթ կժամանեն Վաշինգտոն՝ Իրանի շուրջ բանակցությունների համար: Նրանց թվում են Բեն Շաբբաթը, Իսրայելի պաշտպանության բանակի շտաբի պետ Թամիր Հայմանը, ռազմական հետախուզության ղեկավար Ավիվ Կոհավին եւ «Մոսադի» տնօրեն Յոսի Կոհենը:
Նեթանյահուի բարձրաստիճան օգնականն ասել է, որ ԱՄՆ-ի հետ պառակտման չափը պարզ կդառնա միայն հաջորդ շաբաթ անձնական հանդիպումներից հետո: «Մենք չենք կարծում, որ գործն ավարտված է, եւ քանի դեռ ներդրում ունենալու հնարավորություն ունենք, մենք փորձելու ենք՝ հուսալով, որ դա կփոխի իրավիճակը»։