«Բարձր եմ գնահատում բոլորի բարեմաղթանքները»․ Էլիզաբեթ 2-րդ շնորհակալություն է հայտնել 95-րդ տարեդարձի առթիվ ստացած աջակցության համար

Մեծ Բրիտանիայի թագուհի Էլիզաբեթ 2-րդը շնորհակալություն է հայտնել տարեդարձի կապակցությամբ իրեն աջակցելու և բարի խոսքեր հղելու համար, հայտնում է բրիտանական Daily Mail պարբերականը։

Բուքինգհեմյան պալատը տարածել է թագուհու հայտարարությունը․ «Այսօր ծննդյանս 95-րդ տարեդարձի առթիվ բազմաթիվ բարեմաղթանքներ եմ ստացել, ինչը բարձր եմ գնահատում։ Հակառակ նրան, որ ընտանիքով գտնվում ենք մեծ տխրության մեջ, բոլորիս համար մխիթարություն էր տեսնել ամուսնուս ուղղված հարգանքի տուրքը՝ Միացյալ Թագավորության ներսում, Համագործակցության պետությունների և աշխարհի տարբեր երկրների կողմից։ Ես և իմ ընտանիքը ցանկանում ենք շնորհակալություն հայտնել բոլորիդ՝ վերջին օրերին մեզ ցուցաբերած աջակցության և բարության համար։ Մենք խորապես հուզված ենք»։

Ինչպես ավելի վաղ տեղեկացրել էինք, Մեծ Բրիտանիայի Էլիզաբեթ Երկրորդ թագուհին դարձավ95 տարեկան: Այնուամենայնիվ, այս տարի թագուհին իր ծննդյան օրը նշում է սգի մեջ, քանի օր օրերս կյանքից հեռացել է նրա ամուսինը` Էդինբուրգի դուքս Ֆիլիպը: Նա մահացել էր ապրիլի 9-ին` 99 տարեկանում։

Բացի այդ, հաշվի առնելով Մեծ Բրիտանիայում կորոնավիրուսային համավարակի պատճառով ընդունված սահմանափակումները, միապետի ծննդյան առթիվ տոնակատարություններ չեն անցկացվի:

Պայմանավորված Մեծ Բրիտանիայում հայտարարված սգով՝ այս տարի Բուքինգհեմյան պալատը չի հրապարակի միապետի որևէ պաշտոնական լուսանկար: