Սյունեցիներն իրենց անվտանգության համար պետք է ունենան այնքան մտահոգություն, ինչքան երևանցիները. Արման Եղոյան
Սյունիքը Հայաստանի Հանրապետության վերահսկողության և անվտանգային համակարգի մեջ է: Այս մասին լրագրողների հետ զրույցում նշեց «Իմ քայլը» խմբակցության պատգամավոր Արման Եղոյանը:
«Սյունեցիներն իրենց անվտանգության համար պետք է ունենան այնքան մտահոգություն, ինչքան երևանցիները, քանի որ Սյունիքը և Երևանը գտնվում են նույն անվտանգային համակարգի մեջ»,- ասաց Արման Եղոյանը:
Պատգամավորը նաև անդրադարձավ այսօրվա վարչապետի այցին Սյունիքի մարզի համայնքներ և նշեց՝ հանդիպումները լուսաբանվել են միակողմանի և քաղաքացիներին, որոնք աջակցում են վարչապետին և աջակցող խոսքեր են ասում այդպիսի քաղաքացիներին ցույց չեն տալիս և ողջ խնդիրը կայանում է դրանում։
«Սյունիքի մարզում, ինչպես նաև բոլոր մյուս մարզերում կան մարդիկ, որոնք աջակցում են մեզ և կան մարդիկ, որոնք չեն աջակցում մեզ, ուղղակի տարբերությունը կայանում է նրանում, որ Սյունիքի մարզում մեզ չաջակցող մարդկանց մեծ մասը գործում է կազմակերպված խմբերով՝ որոշակի ուժերի կողմից, և բոլորը գիտեն՝ ինչ ուժերի մասին է խոսքը: Այսօր շատ չեք տեսնի աջակիցներին մամուլում, քանի ոչ վարչապետի այցը լուսաբանվում է միակողմանի»,- նշեց պատգամավորը:
Նա նաև ընդգծեց՝ որ Նիկոլ Փաշինյանի էջով ուղիղ եթեր չկան, դա Սյունիքի հետ կապված չէ, ուղղակի ոճը փոխվել է, իսկ այսօրվա իրադարձությունները եղել են կանխատեսելի:
«Մեզ համար նորություն չէր, որ այսպիսի բան կարող է լինել, իհարկե, այնտեղ կան հստակ միավորված ուժեր, որոնք պլանավորել էին նման շարժ, իրենք առաջիկա ընտրություններին ևս հայտ են ներկայացրել»,- ընդգծեց նա:
Արման Եղոյանը նաև հավաստիացրեց ստեղծված իրավիճակը Սյունիքի մարզում պայմանավորված չէ աշխարհաքաղաքական փոփոխություններով:
«Սյունիքի մարզում կա շատ սպեցիֆիկ իրավիճակ և դա կապված չէ սահմանային խնդիրների հետ, դա շատ ավելի հին խնդիր է և դա պայմավորված է Սյունիքում որոշակի տնտեսական շահեր ունեցող և քաղաքական ամբիցիաներ ունեցող մարդկանց գործունեության հետ»,- նշեց Արման Եղոյանը: