Մոսկվայում կարծում են, որ այդ հարցը պետք է քննարկել միայն երեքով` Երևանի և Բաքվի հետ. Коммерсантъ-ն անդրադարձել է ԵԽԽՎ-ում հայ ռազմագերիների հարցի քննարկմանը
Ռուսական «Կոմերսանտ» պարբերականն անդրադարձել է Եվրոպայի խորհրդի Խորհրդարանական վեհաժողովի գարնանային նստաշրջանի ժամանակ նախօրեին տեղի ունեցած քննարկմանն Ադրբեջանում պահվող հայ ռազմագերիների ճակատագրի թեմայով:
«Բաքուն չի հաստատում ռազմագերիների պահման փաստը` պնդելով, որ քանի որ զինված մարդկանց ձերբակալել են արդեն պատերազմից հետո, ապա նրանք «դիվերսանտներ» (չակերտները` Խմբ.) են և ոչ թե ռազմագերիներ: Նիստում ելույթ ունեցած եվրոպացի պատգամավորների համակրանքը հիմնականում եղել է Երևանի կողմը. պատվիրակները կոչ են արել վերադարձնել զինվորներին` նրանց առևտրի առարկա չդարձնելով: Իսկ ռուսական պատվիրակությունն անտեսել է քննարկումը»,- գրում է պարբերականը` ներկայացնելով Պետդումայի ԱՊՀ հարցերով հանձնաժողովի ղեկավար Լեոնիդ Կալաշնիկովի մեկնաբանությունը. «Մոսկվայում կարծում են, որ այդ հարցը պետք է քննարկել միայն երեքով` Երևանի և Բաքվի հետ»:
ԵԽԽՎ նիստում հայ ռազմագերիների, այլ պահվող անձանց և տեղահանվածների հարցով քննարկումը բացել է ֆրանսիացի պատվիրակ Ալան Միլոնը` շեշտելով, որ վեհաժողովը պետք է ուշադրություն դարձնի ռազմագերիների, տեղահանված անձանց և այլ գերիների հարցին, քանի որ Եվրոպայի խորհրդում իրենք զբաղվում ենք մարդու իրավունքների արժեքների պահպանման հարցերով:
Բացի այդ, եվրապատգամավորը վրդովմունք է հայտնել, որ Ադրբեջանը ռազմագերիներին «ահաբեկիչ» է անվանում: Նրա հետ համաձայնել է ավստրիացի պատգամավոր Շտեֆան Շեննահը, որն իր ելույթում շեշտել է հակառակորդի հանդեպ պատերազմից հետո հարգանքի ցուցաբերման անհրաժեշտությունը:
«Անհրաժեշտ է այժմ անցնել այլ պայքարի` հանուն խաղաղության պայքարի: Ահա թե ինչն է այս պահին գլխավորը»,- շեշտել է ավստրիացին:
«Լեռնային Ղարաբաղի դրաման չի ավարտվի, քանի դեռ մարդիկ գերության մեջ են գտնվում»,- հայտարարել է Ֆրանսիայի ներկայացուցիչ Ալեքսանդրա Լուիսը:
Հայկական տեսակետը ներկայացրել է Երևանի պատվիրակ Ռուբեն Ռուբինյանը, որն ուշադրություն է հրավիրել Իլհամ Ալիևի այն հայտարարության վրա, ըստ որի` «Ադրբեջանը հայերին Ղարաբաղից քշել է շների պես»:
«Ռուս պատվիրակները այս հարցի քննարկմանը չեն մասնակցել: Դեռևս հարցն օրակարգում ընդգրկելու քվեարկության ժամանակ ՌԴ գործողությունները դժգոհություն են առաջացրել հայկական հասարակության շրջանում: Ռուսական պատվիրակության անդամներից ոչ մեկը չի քվեարկել հարցի քննարկման օգտին. Ռուսներից հինգը դեմ է քվեարկել, յոթը` ձեռնպահ մնացել»,- նկատում է հոդվածագիրը:
Կալաշնիկովի խոսքով` ռուս պատվիրակները նախապես են պայմանավորվել ձեռնպահ մնալ քվեարկումից:
«Մենք դեռ եռակողմ ձևաչափ ունենք (Ռուսաստան, Հայաստան և Ադրբեջան), որն իրեն հաջողությամբ է դրսևորել: Ավելի լավ է այնտեղ պայմանավորվենք և ոչ թե դա դնենք միջազգային քննարկման»,- բացատրել է Կալաշնիկովը:
Ադրբեջանցի քաղաքագետ, «Վալդայ» քննարկումների ակումբի անդամ Ֆարհադ Մամմադովը պարբերականի հետ զրույցում կարծիք է հայտնել, որ հայ ռազմագերիների ճակատագիրը կախված է նրանից` կհամաձայնի արդյոք Մոսկվան ավելի մանրակրկիտ վերահսկողություն իրականացնել Լաչինի միջանցքի նկատմամբ, որը միավորում է Ղարաբաղն ու Հայաստանը:
«Բաքվի վարկածով` հայ ռազմագերիները տարածաշրջան են ժամանել արդեն հրադադարի մասին համաձայնագրի ստորագրումից հետո, հետևաբար անցել են ճանապարհով, երբ այն գտնվում էր ռուս խաղաղապահների վերահսկողության տակ: Ժամանակը գնում է, և հնարավոր է, որ մոտ ապագայում այդ մարդկանց նկատմամբ դատալսումներ սկսվեն: Դրանից հետո հարցը լուծելն ավելի բարդ կլինի»,- ասել է Մամմադովը: