Johnson & Johnson պատվաստանյութը կրկին կօգտագործվի ԵՄ տարածքում, սակայն պիտակի վրա կնշվի թրոմբի առաջացման հավանականությունը

Կորոնավիրուսի դեմ Johnson & Johnson պատվաստանյութը կրկին կկիրառվի ԵՄ տարածքում այն բանից հետո, երբ Դեղամիջոցների եվրոպական գործակալությունը հայտարարել է, որ պատվաստանյութի կիրառման օգուտները գերազանցում են շատ արյան թրոմբի առաջացման վտանգը, հայտնում է Reuters լրատվական գործակալությունը։

Ինչպես ավելի վաղ տեղեկացրել էր Tert.am-ը, Դեղամիջոցների եվրոպական գործակալությունը (ЕМА), գնահատելով Johnson & Johnson ընկերության պատվաստանյութը ստացած անձանց մոտ թրոմբոզի առաջացման վտանգները, հայտարարել է, որ հնարավոր կապ է հայտնաբերել պատվաստման և պատվաստվածների մոտ ծայրահեղ հազվադեպ բարդությունների առաջացման միջև: Սակայն գործակալությունը խորհուրդ է տվել պատվաստանյութի արտադրանքի պիտակի վրա նախազգուշացում ավելացնել արյան թրոմբոցիտների ցածր քանակի դեպքում հազվադեպ դեպքերում թրոմբի առաջացման հավանականության մասին։

Հայտնի է, որ Johnson & Johnson պատվաստանյութի արժեթղթերի գինն աճել են ավելի քան 2 տոկոսով։ Ընկերությունը տեղեկացրել է, որ պիտակի վրա անպայման ներառված կլինի նախազգուշացում ռիսկերի վերաբերյալ։

Ավելի վաղ ԱՄՆ-ի առողջապահական մարմինները կոչ էին անում դադարեցնել Johnson & Johnson պատվաստանյութի օգտագործումը՝ արյան թրոմբի առաջացման գրանցված դեպքերի ֆոնին։

ԱՄՆ-ի Սննդի և դեղերի վարչությունը տեղեկացրել էր, որ թրոմբի առաջացման 6 դեպք է գրանցվել 6,8 միլիոն չափաբաժին պատվաստանյութի կիրառման սահմաններում: Վարչությունը խորհուրդ էր տվել դադարեցնել պատվաստանյութի օգտագործումը՝ անվտանգության նկատառումներից ելնելով։ Բոլոր դեպքերը գրանցվել էին 18-ից 48 տարեկան կանանց մոտ, իսկ ախտանշանները հայտնվել էին պատվաստումից 13 օր անց։

Հիշեցնենք, որ Դեղամիջոցների եվրոպական գործակալությունը ուսումնասիրել է ԱՄՆ-ում պատվաստված անձանց շրջանում թրոմբոզի հետ կապված բարդացումների 8 դեպք:

Johnson & Johnson-ն ամերիկյան ընկերություն է, սակայն պատվաստանյութը հիմնականում մշակվել է ընկերության Բելգիայում գտնվող դեղագործական մասնաճյուղի կողմից և հայտնի է նաև որպես Janssen: Ի տարբերություն այլ պատվաստանյութերի` այն ներարկվում է մեկ անգամով և կարող է պահվել սառնարանի սովորական ջերմաստիճանում՝ դյուրացնելով դրա տարածումը ավելի տաք և հեռու տարածաշրջաններում։

Ավելի վաղ ընկերությունը հայտարարություն էր տարածել, որում ասվում էր, որ անվտանգությունն իր «թիվ մեկ առաջնահերթությունն է», և որ առողջապահական մարմինների հետ կիսվում է «բոլոր իրադարձությունների հաշվետվություններով»:

Այժմ ընկերությունը կկատարի իր ստանձնած պարտավորությունները՝ 200 միլիոն դեղաչափ պատվաստանյութ ԵՄ և 100 միլիոն դեղաչափ Միացյալ Նահանգներ ուղարկելու վերաբերյալ։